“Qəhvə deyil, təəssürat satılır: Avropada kafelər niyə dəyişir?”

Sahibkartv.az xəbər verir ki, Avropada son illərdə açılan minlərlə yeni nəsil kafe artıq sadəcə içki və desert təklif etməklə kifayətlənmir. Bu məkanlar özlərini “təcrübə məkanı” kimi təqdim edir və qazancın əsas hissəsini sosial interaktivlik üzərində qururlar. Gələn müştərilər üçün əsas dəyər — içdikləri qəhvənin keyfiyyətindən çox, həmin məkanın onlarda buraxdığı emosional izdir.

Bu kafelərdə artıq divarları sadəcə dekorasiya deyil — onlar bəzən sərgi divarına, bəzən mini səhnəyə çevrilir. Kitab mübadilə guşələri, həftəlik poeziya axşamları, yerli musiqiçilərin canlı performansları və “açıq mikrofon” günləri bu məkanlara sadə kafe deyil, kiçik sosial mərkəz funksiyası qazandırır. Müştəri buraya bir fincan qəhvə üçün deyil, fərqli insanlarla tanış olmaq, ideya paylaşmaq və özünü ifadə etmək üçün gəlir.

Bir çox sahibkar üçün bu yanaşma ikiqat faydalıdır: həm müştəri loyallığını artırır, həm də əlavə gəlir kanalları açır. Qısa desək, məhsul deyil, mühit satılır. Artıq müasir kafe sahibkarı üçün əsas məqsəd dadlı içki hazırlamaqdan çox, insanların gündəlik həyat rutinindən çıxaraq özlərini ifadə edə biləcəyi bir platforma yaratmaqdır. Və bu model sürətlə yayılmağa davam edir.