Noyabrın 26-da Azərbaycan Prezidenti İlham Əliyevin, Rusiya Prezidenti Vladimir Putinin və Ermənistanın baş naziri Nikol Paşinyan Soçidə görüşdülər.
Görüşün nəticəsində üçtərəfli bəyanat qəbul edildi.
Bu sənəd 10 noyabr və 11 yanvar bəyanatlarının məntiqi davamıdır.
Milli Məclisin deputatı Sahib Alıyev sosial şəbəkə hesabında bildirib ki, Soçi görüşündə sərhədlərin tanınması və Zəngəzur dəhlizinin açılmasıyla bağlı Azərbaycanın tələbləri təmin edilib.  
“Bu məsələdə noyabrın 16-da Ermənistanın növbəti təxribatının qarşısı alınarkən ordumuzun peşəkarlığı, başda şəhidlərimiz və qazilərimiz olmaqla hərbçilərimizin fədakarlığı az rol oynamadı”, - deyə S.Alıyev əlavə edib.
Onun sözlərinə görə, “bir günlük savaş” kimi tarixə düşən döyüşlərdən sonra Ermənistanda revanşizm xəyalları quranlar bir daha anladılar ki, təslimçilikdən başqa ayrı yolları yoxdur.
“Maraqlıdır ki, ermənilərin ağlı başında olan ekspertləri bildirirlər ki, Azərbaycan ordusu təkcə texniki yox, peşəkarlıq və psixoloji baxımdan da onlarınkından qat-qat üstündür.
Bir sözlə, Soçi bəyanatı Müzəffər Ali Baş Komandanımız İlham Əliyevin qətiyyətinin, diplomatik bacarığının və təbii ki, onun qurduğu ordunun döyüşlərdəki uğurlarının nəticəsidir”, - deyə deputat fikrini yekunlaşdırıb.