Azərbaycan Sahibkarlar Konfederasiyası (ASK) ölkə iqtisadiyyatının təbliği, xarici investorların cəlbi, Azərbaycan məhsullarının xarici ölkələrdə təşviq olunmasına öz töhfəsini vermək üçün  xarici nümayəndələrinin sayını artırır.  ASK-nın Özbəkistan Respublikasında nümayəndəsi vəzifəsinə Fərid Aqil oğlu Verdiyev təyin edilib.
F.Verdiyev 1996-2000-ci illərdə Bakı Dövlət Universitetinin Hüquq, 2000-2004-cü illərdə Bakı Dövlət İqtisad Universitetinin Beynəlxalq İqtisadiyyat və 2013-cü ildə Moskva Dövlət İqtisadiyyat Universitetinin Dünya İqtisadiyyatı ixtisasları üzrə təhsil alıb.
F.Verdiyev əmək fəaliyyətinə “Bakı Şərab-1” ASC-də hüquq məsləhətçisi kimi başlamış daha sonra isə Hüqüq və kadrlar şöbəsinin rəisi olmuşdur. O, 2010-2011-ci illərdə Standartlaşdırma, Metrologiya və Patent üzrə Dövlət Komitəsinin Təcrübə-Sınaq Mərkəzinin (Az.TEST) Direktor müavini kimi fəaliyyət göstərib.
Fərid Verdiyev Özbəkistan Respublikasında fəaliyyət göstərən “A-sera Asia” MMC-nin təsisçisi, eləcə də Türkiyə Respublikasında təsis edilmiş “Six Sigma İthalat İhracat LTD”nin rəhbəridir.
ASK-nın Özbəkistandakı tərəfdaşları, o cümlədən, Özbəkistan Respublikası Ticarət və Sənaye Palatası ilə məhsuldar əməkdaşlığı barədə nümayəndəyə geniş məlumat verilib və hər iki ölkə arasında iqtisadi əməkdaşlığı yüksəltmək üçün onun qarşısında konkret hədəflər qoyulub.