Azərbaycanın Ukraynadakı səfirliyinin dəstəyi ilə Odessa meriyasının qarşısında şəhərlərin məsafə nişanı göstərilən məkana Gəncənin adının əlavə edilməsi məsələsi müsbət həllini tapıb. 

Artıq dünyanın bir sıra paytaxt və iri şəhərləri arasına Odessadan Gəncəyə olan məsafəni göstərən istiqamət nişanı da əlavə edilib.

Xatırladaq ki, iyunun sonlarında Azərbaycanın Ukraynadakı səfiri Seymur Mərdəliyevin Odessaya səfəri zamanı meriya rəhbərliyi ilə görüşündə bu məsələ qaldırılmışdı. Bildirilmişdi ki, Odessa və Gəncə qardaşlaşmış şəhərlərdir, onların arasında ikitərəfli əməkdaşlıq mövcuddur. Bu baxımdan Gəncə şəhərinin adı Odessanın mərkəzində yerləşən dünya şəhərlərinin məsafə nişanı göstərilən məkana əlavə edilməlidir. Səfirliyin Odessa şəhər meriyası ilə sıx əməkdaşlığından sonra Gəncə şəhərinin adı olan nişan göstərilən məkana əlavə edilib. 

Xatırladaq ki, Gəncə və Odessa şəhərlərinin qardaşlaşması ilə bağlı “Niyyətlər haqqında protokol” 2019-cu il dekabrın 17-də Ukrayna Prezidenti Volodimir Zelenskinin Azərbaycana rəsmi səfəri zamanı imzalanıb.