Türkiyədən Azərbaycana iribuynuzlu mal-qara üçün genetik materialın ikinci partiyası tədarük edilib. 

Türkiyənin kənd təsərrüfatı və meşəçilik naziri İbrahim Yumaklı bildirib. 

Nazirin sözlərinə görə, genetik materialın tədarükü Türkiyənin Aqrar Təsərrüfatlar üzrə Baş idarəsi tərəfindən həyata keçirilib. O xatırladıb ki, azərbaycanlı heyvandarlar üçün bu materialın 7200 doza həcmində ilk partiyası 2023-cü ildə göndərilib. 

Türkiyəli nazir deyib: “Bu məsələ Türkiyə və dost ölkələrimiz üçün ərzaq təhlükəsizliyi əhəmiyyətini daşıyır. Onun tədarükü sayəsində Azərbaycandakı heyvandarlar yüksək keyfiyyətli genetik material əldə edirlər ki, bu da məhsuldarlığı daha da artıracaq. Biz Türkiyənin aqrar sahədə əldə etdiyi təcrübəni və bilikləri bölüşməyə hazırıq”. 

Nazir bildirib ki, fermer təsərrüfatlarında genetik öküz materialının stimullaşdırılması Türkiyənin 2024-2028-ci illərdə heyvandarlığın inkişafı üzrə Dövlət proqramının prioritetlərindən biridir. Onun sözlərinə görə, təkcə “Sultansuyu” müəssisəsində 1 milyon dozaya yaxın öküz toxumu istehsal olunur və dondurulur.