İqtisadiyyat Nazirliyi yanında Əmlak Məsələləri Dövlət Xidmətinin nümayəndələri Rusiya Federasiyasının paytaxtı Moskvada “Konsepsiya 2024. Kadastr qiymətləndirilməsi” mövzusunda keçirilən tədbirdə iştirak ediblər. 

Əmlak Məsələləri Dövlət Xidmətindən bildirilib ki, tədbirdə torpaq sahələrinin kadastr məlumatları və onların qiymətləndirilməsi ilə bağlı çıxışlar olub, müzakirələr aparılıb. Qeyd olunub ki, daşınmaz əmlakın, xüsusilə kənd təsərrüfatı təyinatlı torpaqların tam və dəqiq kadastrının aparılması və qiymətləndirilməsi ölkənin iqtisadi inkişafında mühüm əhəmiyyət kəsb edir. Bu məlumatlar daşınmaz əmlakın yerləşməsi və ölçülərindən, torpaq sahələrinin göstəricilərindən, mülkiyyət hüququndan və digər informasiyalardan ibarətdir.

Məlumatların vahid və dəqiq olması ölkənin sosial-iqtisadi inkişafı, investisiya imkanlarının genişləndirilməsi baxımından böyük əhəmiyyət kəsb edir.

Tədbirdə, həmçinin torpaqların kadastr qiymətləndirilməsində əsas meyarlar, kadastr xidmətlərinin işində əsas problemlər və onların həlli yolları, torpağın kadastr qiymətləndirilməsi üzrə tənzimləmə mexanizmləri ilə bağlı fikir mübadiləsi aparılıb, iştirakçılara bu istiqamətdə məlumat verilib.