Braziliyanın Milli Sənaye Konfederasiyasının Ətraf mühit və dayanıqlı inkişaf üzrə rəsmisi Davi Bomtemponun rəhbərlik etdiyi yüksək səviyyəli nümayəndə heyəti Bakı Limanına səfər edib. 

Bakı Limanından bildirilib ki, limanın Baş direktoru Taleh Ziyadovla görüş keçirilib, Bakı Limanının Orta Dəhliz üçün yaşıllaşdırılma layihələri və onun qlobal əlaqədə əsas rolu müzakirə edilib. Braziliyanın Milli Sənaye Konfederasiyasının Yaşıl liman, Dayanıqlılıq, Ekoloji, sosial və korporativ idarəetmə (ESG) prinsipləri və Bakı Limanının karbon emissiyasının azaldılması üçün yaşıl həllər üzrə təcrübəsi ilə bağlı fikir mübadiləsinə hazır olduğu bildirilib.

Görüş zamanı konfederasiya başda olmaqla, Braziliyanın aparıcı özəl şirkətlərinin bu ilin noyabrında COP29 çərçivəsində Limanın ikinci mərhələsinin genişləndirilməsi planı üzrə potensial biznes imkanlarını araşdırmaq üçün Bakı Limanına səfər etməsi razılaşdırılıb. 

Braziliyanın ən böyük biznes platforması olan Milli Sənaye Konfederasiyası davamlı inkişafı təşviq edir və 27 dövlət federasiyasını və 200 mindən çox müəssisəni özündə birləşdirir.

Görüşdə Braziliyanın ölkəmizdəki səfiri Manuel Adalberto Karlos Monteneqro Lopes da Kruz da iştirak edib.