Bu gün Bakıda akrobatika gimnastikası üzrə XXVIII dünya çempionatının təntənəli açılış mərasimi keçirilib. 
Sahibkartv.Az xəbər verir ki, əvvəlcə iştirakçı ölkələrin paradı olub. Sonra idmançı, məşqçi və hakim heyətinin ədalət prinsiplərinə sadiq qalacaqlarına dair andiçmə mərasimi olub. 
İdmançıları Azərbaycan təmsilçisi Ağasif Rəhimov təmsil edib. Açılış mərasimində çıxış edən Azərbaycanın gənclər və idman naziri Fərid Qayıbov dünya çempionatının iştirakçılarını salamlayıb. 
O bildirib ki, müstəqil Azərbaycan tarixində ölkəmiz müxtəlif idman növləri üzrə mötəbər yarışları təşkil etməsi ilə yadda qalıb: 
“Ötən illər ərzində Bakı bədii gimnastika, aerobika gimnastikası və batut gimnastikası üzrə dünya çempionatlarına ev sahibliyi edib. 
Bu gün isə akrobatika gimnastikası üzrə dünya çempionatına start verilir. Bu da Azərbaycan Gimnastika Federasiyasının beynəlxalq aləmdə fəal olmasından xəbər verir. 
Azərbaycan Gimnastika Federasiyasının prezidenti Mehriban xanım Əliyevaya gimnastika növlərinin inkişafında görülən işlərə görə öz minnətdarlığımı bildirirəm”, - deyə nazir əlavə edib. 
Beynəlxalq Gimnastika Federasiyasının (FIG) yaponiyalı prezidenti Morinari Vatanabe isə qeyd edib ki, hazırkı vəziyyət heç də asan deyil: 
“Son günlər dünyada baş verən ürəkağrıdan hadisələr və bundan əziyyət çəkən insanlara görə dərin təəssüf və kədər hissi keçirirəm. Ümid edirəm ki, bütün insanların sağlam və sülh şəraitində yaşayacağı gün tezliklə gələcək. Qlobal pandemiyanın hökm sürdüyü və müharibə ilə üzləşən bir qitədə dünya çempionatının keçirilməsi böyük məsuliyyətdir. Lakin seçim şansımız yoxdur və biz ciddi tədbirlərə riayət etməliyik. Sizin dostluq və həmrəyliyinizi bütün dünyaya nümayiş etdirəcəyinizə inanıram. Yerli təşkilat komitəsinə, könüllülərə və bu tədbirin həyata keçirilməsində əməyi olanlara göstərdikləri səylərə görə səmimi qəlbdən minnətdarlığımı bildirirəm və dünya çempionatını açıq elan edirəm”. 
Sonra Azərbaycanın Dövlət Himni səsləndirilib. Açılış mərasiminə bədii hissə ilə yekun vurulub və yarışa start verilib. 
10:10
Bu gün Bakıda akrobatika gimnastikası üzrə dünya çempionatına start veriləcək.
Sahibkartv.Az xəbər verir ki, saat 10:45-də yarışın açılış mərasimi olacaq.
Saat 11:00-da isə yarış rəsmən başlayacaq. Yarışda 17 ölkədən 170 gimnastın iştirakı gözlənilir. İdmançılar qadın, kişi və qarışıq cütlükləri, eləcə də qadın və kişi qrupları proqramlarında balans, temp və qarışıq hərəkətlər üzrə çıxış edəcəklər.
Yarışda Azərbaycanı gənclər arasında Avropa çempionları – Daniel Abbasov və Murad Rəfiyev kişi cütlüyü tərkibində təmsil edəcək. Qarışıq cütlüklər tərkibində isə beynəlxalq turnirlərin qalibləri – Sabir Ağayev və Mehriban Salamova, Avropa çempionatının gümüş və bürünc mükafatçıları – Ağasif Rəhimov və Raziyə Seyidli mübarizə aparacaq.
Qeyd edək ki, Milli Gimnastika Arenasında keçiriləcək yarış 4 gün davam edəcək və martın 13-də başa çatacaq.
Xatırladaq ki, 2018-ci ildə ölkəmiz ilk dəfə akrobatika gimnastikası üzrə Dünya Kubokuna, bu il martın 3-dən 6-dək isə bu növ üzrə 12-ci Dünya Yaş Qrupları Yarışlarına ev sahibliyi edib.