Belçika millisi Kopenhagendə keçirilən görüşdə meydan sahibi Danimarka üzərində 2:1 hesabı ilə əzmkar qələbə qazanıb. AVRO-2020-nin favoritlərindən sayılan, son dünya üçüncüsü Belçika millisi bununda xalını altıya yüksəldib və B qrupundan 1/8 finala vəsiqə qazanan ilk komanda olub.
Qeyd edək ki, daha əvvəl İtaliya millisi A qrupundan pley-offa vəsiqə qazanmışdı. 
21:34

Belçika millisi ikinci hissədə meydana girmiş ulduz futbolçularının hesabına daha bir qol vurdu. Bu dəfə Eden Azarın məhsuldar ötürməsi ilə Kevin de Bröyne ilk qolunu vurdu. Bu, 70-ci dəqiqəyə təsadüf etdi.
21:16

Belçika hesabı bərabərləşdirdi. İkinci hissədə meydana daxil olmuş Kevin de Bröynenin 55-ci dəqiqədə məhsuldar ötürməsini Torqan Azar qola çevirdi – 1:1.
20:04

Danimarka – Belçika matçında hesab erkən açılıb. 
Meydan sahiblərinin hücumçusu Poulsen 2-ci dəqiqədə komandasını hesabda önə çıxarıb.
20:02

Danimarka - Belçika matçı start götürüb.
Hazırda oyunda hesab açılmayıb. 
19:41

Azərbaycanın da ev sahiblərindən biri olduğu AVRO-2020 davam edir.
Sahibkartv.Az xəbər verir ki, bu gün B qrupunun ikinci oyununda Danimarka ilə Belçika üz-üzə gələcəklər.
Danimarka da turnirin təşkilatçı ölkələrindən biri olduğu üçün görüş Kopenhagendə, “Parken” stadionunda keçiriləcək.
Artıq hər iki komanda start heyətlərini açıqlayıb.
Danimarka (4-2-3-1): Şmaykl; Kristensen, Kyaer, Vesterqaard, Maehle; Höybyerq, Delani; Vass, Poulsen, Damsqaard; Breytveyt.
Belçika (3-4-3): Kurtua; Alderveyreld, Denayer, Vertonqen; Mönye, Tilemans, Dendonker, Torqan Azar; Karasko, Mertens, Lukaku
Qeyd edək ki, oyun saat 20:00-da start götürəcək.