İspaniya kubokunun 1/4 final görüşündə “Qranada” və “Barselona” üz-üzə gəlib.
“Los-Karmenes” stadionunda baş tutan qarşılaşmanın əsas vaxtı 2:2 hesabı ilə başa çatıb.
Əlavə vaxtda isə azarkeşlər daha dörd qolun şahidi olub və beləliklə qonaqlar 3:5 hesabı ilə qalib gəliblər.
Oyunda hesabı “Qranada”nın yarımmüdafiəçisi Kenedi 33-cü dəqiqədə açıb. Ev sahiblərinin ikinci qolunu 47-ci dəqiqədə Roberto Soldado vurub. “Qranada” hesabı uzun müddət qoruya bilsə də, 88-ci dəqiqədə Antuan Qrizman fərqi azaldıb.
İkinci hissəyə əlavə edilmiş dəqiqələrdə isə “Barselona” oyunu əlavə vaxta aparmağa nail olub. Bu dəfə Jordi Alba fərqlənib.
Əlavə vaxtda Antuan Qrizman yenidən səhnəyə çıxaraq, “Barsa”nı önə çıxarıb. Cəmi üç dəqiqə sonra Fede Viko on bir metrlik cərimə zərbəsindən hesabı yenidən bərabərləşdirib.
Lakin “Barselona” 108-ci dəqiqədə Frenki De Yonqun və 113-cü dəqiqədə Jordi Albanın qolları ilə hesabı 3:5-ə çatdırıb.
Qarşılaşmada qalib gələn “Barselona” İspaniya Kubokunun yarımfinalına çıxıb.