“Qarabağ” bizim qürurumuzdur. Dünən bir daha sübut olundu ki, Avropadakılar bu komandadan qorxurlar”.

Bunu “Sahibkartv.az”a açıqlamasında AFFA-nın vitse-prezidenti Vaqif Sadıqov “Qarabağ”ın UEFA Avropa Liqasındakı çıxışı barədə danışarkən deyib.
64 yaşlı mütəxəssis Azərbaycan çempionunun “Hakken”i İsveçdə 1:0 hesabı ilə məğlub etdiyi qrup mərhələsinin II turunun matçını dəyərləndirib: “Dünən meydanda müdrik “Qarabağ” izlədim. Uğurlu nəticə əldə etmək üçün etibarlı oyun sərgilədilər və lazım olan qolu vurdular. Avrokuboklarda rəqiblər “Qarabağ”a qarşı getdikcə daha məsuliyyətlə hazırlaşırlar”.
V.Sadıqovun fikrincə, ilk iki turda hesabına 6 xal yazdıran Ağdam təmsilçisi UEFA Konfrans Liqasının pley-off mərhələsinə vəsiqəni böyük ölçüdə təmin edib: “Qarabağ” pley-offa vəsiqə yolunda inamlı addımlar atır. Bu komandanın matçı zamanı tabloya ən sonda baxıram. Çünki “Qarabağ” sərgilədiyi oyunla pley-offa layiq olduğunu göstərir. Fikrimcə, Konfrans Liqasının pley-offuna vəsiqə, demək olar ki, təmin olunub. Ancaq əminəm ki, hədəf bundan da böyükdür - yola Avropa Liqasında davam etmək. “Hakken”lə evdə və “Molde” ilə səfərdə keçiriləcək görüşlər bu baxımdan çox önəmli olacaq”.
Milli assosiasiya rəsmisi “Qarabağ”ın III və IV turlarda üz-üzə gələcəyi Almaniya “Bayer 04”ü ilə görüşlərinə də toxunub: “Bayer 04”ü qrupun aşkar favoriti sayıram. Amma “köhlən atlar”ın “alman maşını”na qarşı gücünü sınaması və nəyə qadir olduğuna baxmağımız çox maraqlı olacaq. “Qarabağ”ın leverkuzenlilərlə qarşılaşmalarda da simasını itirməyəcəyinə inanıram”.
Qeyd edək ki, “Qarabağ” qrupda növbəti oyununu oktyabrın 26-da Almaniyada “Bayer 04”ə qarşı keçirəcək.