Amerikanın İrandakı əməliyyatı artıq rejim dəyişikliyi ilə nəticələnib və yeni liderlər "məqbul"durlar.

Bunu ABŞ Prezidenti Donald Tramp deyib.

"Rejim dəyişikliyi artıq baş verib, əgər görürsünüzsə, bir rejim məhv edildiyi üçün hamısı ölüb. Növbəti rejim əsasən ölüb və üçüncü rejimlə biz əvvəllər heç kimin qarşılaşmadığı fərqli insanlarla məşğul oluruq. Bu, tamamilə fərqli bir qrup insandır. Ona görə də düşünürəm ki, rejim dəyişib və açığı, onlar çox ağıllıdırlar", - Tramp qeyd edib.

Lakin Tramp konkret olaraq kimi nəzərdə tutduğunu və ABŞ-ın konkret olaraq kiminlə məşğul olduğunu dəqiqləşdirməyib.

“Financial Times”ə müsahibədə isə Tramp deyib ki, hazırkı İran hakimiyyətini "tamamilə fərqli insanlar" və "çox peşəkar" adlandırıb.

Tramp onu da əlavə edib ki, İran Vaşinqtonun münaqişəyə son qoymaq üçün vasitəçi tələblərinin əksəriyyətini qəbul edib. "Onlar əksər məqamlara cavab veriblər", - o vurğulayıb.
Onun sözlərinə görə, Tehran Vaşinqtonun təklif etdiyi planla razıdır.

"Onlar planla bağlı bizimlə razılaşdılar. Biz 15 şərt irəli sürdük və bunun əksəri qəbul edilib, daha bir neçə şey istəyəcəyik", - deyə Amerika lideri bildirib.

Tramp "The Financial Times"ə müsahibəsində İran neftini "ələ keçirmək" istədiyini də dilə gətirib.

“Düzünü desəm, mənim ən sevdiyim seçim İran neftini götürməkdir, amma ABŞ-dakı bəzi axmaq insanlar deyirlər ki, “Bunu niyə edirsiniz?” Amma onlar axmaq insanlardır”, - deyə Tramp bildirib.

O, İranın Körfəzdəki əsas neft ixrac mərkəzi olan Xarq adasını ələ keçirməyi istisna etməyib. Tramp hesab edir ki, İranın adanı müdafiə etmək gücü çatmır və ABŞ onu "çox asanlıqla" ələ keçirə bilər.

Tramp onu da  qeyd edib ki, Amerika silahlı qüvvələri Yaxın Şərqdəki hərbi əməliyyatlar zamanı artıq "13.000 hədəfi bombalayıb" və hələ də təxminən 3.000 hədəf qalıb.