Tehranda Əfqanıstan hökumət nümayəndələri və “Taliban” hərəkatının siyasi nümayəndə heyətinin iştirakı ilə danışıqlar başlayıb.
Sahibkartv.az “ISNA” agentliyinə istinadən xəbər verir ki, iclas İranın xarici işlər naziri Məhəmməd Cavad Zərifin çıxışı ilə başlayıb. O, əfqanlıları xarici işğalçılara qarşı dəstəkləməkdən qürur duyduğunu deyib.
Əfqanıstanla “Taliban” məsələsində danışıqlar masasına qayıtmağın ən yaxşı seçim olduğunu deyən nazir İranın bu ölkədə baş verən münaqişə və böhranların həllinə töhfə verməyə hazır olduğunu vurğulayıb.
Xatırladaq ki, iyun ayının ortalarından başlayaraq Əfqanıstan və Tacikistan sərhədlərində vəziyyət gərginləşib. Bu zaman ABŞ və NATO qüvvələrinin Əfqanıstanı tərk etməsi fonunda talibanlar şimalda öz fəaliyyətlərini aktivləşdiriblər.
Minimal hesablamalara görə, talibanlar Əfqanıstanın 50 rayonunu ələ keçirib. Regional rəhbərliklərin məlumatlarına görə isə, bu rəqəm daha böyükdür.
Ən təhlükəlisi ondan ibarətdir ki, talibanlar Tacikistan, Özbəkistan və Türkmənistan sərhədlərində sərhəd bölgələrini, həmçinin bir neçə nəzarət məntəqələrini tutublar.