“Azərbaycanda sahibkarlığın inkişafı, investisiya imkanlarının artırılması və yerli məhsulların xarici bazarlara çıxarılması istiqamətində yeni addımlar atılır. İqtisadiyyat Nazirliyi yanında Kiçik və Orta Biznesin İnkişafı, İnvestisiyaların və İxracın Təşviqi Agentliyinin yaradılması bu sahələrdə görülən işlərin daha əlaqəli şəkildə həyata keçirilməsi baxımından mühüm əhəmiyyət daşıyır”.
Bu sözləri Musavat.com-a Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov deyib.
O diqqətə çatdırıb ki, yeni qurumun fəaliyyətinin əsas məqsədlərindən biri sahibkarların qarşılaşdığı çətinliklərin azaldılması və onların biznes imkanlarının genişləndirilməsidir:
“Xüsusilə mikro, kiçik və orta müəssisələrin dəstəklənməsi, dövlət xidmətlərinə çıxışının asanlaşdırılması və yeni layihələrin həyata keçirilməsinə kömək göstərilməsi iqtisadi fəallığın artmasına şərait yarada bilər. Bu gün yerli şirkətlər üçün ən vacib məsələlərdən biri məhsullarını yalnız daxili bazarda deyil, xarici ölkələrdə də tanıtmaq və satış imkanlarını genişləndirməkdir. Bunun üçün beynəlxalq tərəfdaşlarla əlaqələrin qurulması, yeni bazarların öyrənilməsi və ixrac prosedurları ilə bağlı sahibkarlara dəstək göstərilməsi mühüm rol oynayır. Agentliyin bu istiqamətdə fəaliyyəti Azərbaycan istehsalçılarının xarici bazarlarda daha fəal iştirakına imkan verə bilər.
Ölkəyə yeni investisiyaların cəlb olunması da iqtisadi inkişafın əsas şərtlərindən biridir. Xarici investorların yerli biznesə marağının artırılması, müasir texnologiyaların tətbiqi və birgə istehsal layihələrinin təşviqi yeni iqtisadi imkanlar yarada bilər. Bununla yanaşı, biznes mühitinin yaxşılaşdırılması, inzibati maneələrin azaldılması və investorlarla işin daha səmərəli təşkili qarşıda duran vacib vəzifələrdəndir. İqtisadiyyatın şaxələndirilməsi və qeyri-neft sektorunun gücləndirilməsi də xüsusi diqqət tələb edir. Kənd təsərrüfatı, sənaye, qida istehsalı və emal sahələrində yerli müəssisələrin fəaliyyətinin genişləndirilməsi ölkənin ixrac potensialını artıracaq. Bu sahələrdə rəqabətədavamlı məhsulların istehsalı həm daxili tələbatın ödənilməsinə, həm də xarici bazarlarda yeni mövqelərin qazanılmasına xidmət edəcək”.
Deputat qeyd edib ki, regionlarda sahibkarlığın inkişafı da bu prosesin mühüm hissəsidir:
“Bölgələrdə yeni müəssisələrin açılması, yerli istehsalın genişləndirilməsi və sahibkarların dəstək proqramlarından yararlanması iqtisadi fəallığın artmasına kömək edə bilər. Eyni zamanda, bu addımlar yeni iş yerlərinin yaradılması və regionların iqtisadi imkanlarının daha geniş istifadəsi baxımından da əhəmiyyətlidir. Yeni Agentliyin yaradılması dövlətlə biznes arasında əməkdaşlığın yeni mərhələyə keçməsi üçün imkanlar açır. Lakin əsas məsələ nəzərdə tutulan tədbirlərin praktik nəticələr verməsidir. Sahibkarların müraciətlərinə çevik yanaşma, dövlət xidmətlərinin sadələşdirilməsi və investisiya layihələrinin həyata keçirilməsinə dəstək qurumun fəaliyyətində mühüm yer tutmalıdır. Bütün bunlar göstərir ki, yeni Agentliyin qarşısında geniş vəzifələr dayanır. Onların uğurla həyata keçirilməsi Azərbaycan şirkətlərinin böyüməsinə, yerli məhsulların beynəlxalq bazarlarda tanınmasına və ölkəyə yeni kapitalın cəlb edilməsinə müsbət təsir göstərə bilər. Əldə olunacaq nəticələr isə ölkə iqtisadiyyatının daha dayanıqlı inkişafına və qeyri-neft sektorunun ümumi iqtisadiyyatda rolunun artmasına şərait yarada bilər”.
