“Azərbaycanla mədəni əməkdaşlığın inkişafı Özbəkistan üçün prioritet məsələdir”.
Bunu “Sahibkartv.az”a müsahibəsində Özbəkistanın mədəniyyət nazirinin müavini Muradcan Məcidov deyib.
Onun sözlərinə görə, Özbəkistan musiqi, teatr sənəti, muzey işi, eləcə də mədəni irs obyektlərinin qorunması və bərpası sahələrində Azərbaycanla əməkdaşlığı fəallaşdırmaq niyyətindədir.
“Azərbaycanla Özbəkistan qarşılıqlı hörmətə, siyasi, iqtisadi və humanitar sahələrdə bərabərliyə əsaslanan fəal dialoq aparır. İki ölkə arasında mədəniyyət və incəsənət sahəsində qarşılıqlı əlaqələr Özbəkistan Respublikası Hökuməti ilə Azərbaycan Respublikası Hökuməti arasında humanitar əməkdaşlıq sahəsində Saziş çərçivəsində dəstəklənir. Son illər ərzində Özbəkistan və Azərbaycan arasında bir sıra sahələrdə, o cümlədən mədəni-humanitar sahədə əməkdaşlığın əhəmiyyətli inkişafı müşahidə olunur”, - nazir müavini bildirib.
Nazir müavininin sözlərinə görə, Azərbaycandan olan nümayəndələr hər il avqust ayında Səmərqənddə keçirilən ənənəvi “Şərq təranələri” beynəlxalq musiqi festivalında fəal iştirak edirlər. “Belə ki, I və XI festivallarda onlar Qran-pri sahibi olublar, III, V, VII və XII festivallarda isə birinci yeri tutublar”, - o vurğulayıb.