Bakı, oktyabr 2025 – Africa–Azerbaijan Cooperation (AFAZ) və onun üzv şirkətləri Addis Ababa Chamber of Commerce and Sectoral Associations (Addis Chamber) ilə birlikdə Efiopiyada keçiriləcək Biznes Forum öncəsi Zoom platforması üzərindən onlayn görüş keçiriblər.
Sahibkartv.az xəbər verir ki, görüş zamanı Azərbaycan sahibkarları və AFAZ üzvləri öz məhsul və xidmətlərini Efiopiya tərəfinə təqdim edib, qarşılıqlı əməkdaşlıq imkanlarını müzakirə ediblər. Tərəflər forumun səmərəli keçirilməsi üçün təşkilati hazırlıqları, iştirak edəcək şirkətlərin müəyyənləşdirilməsini və iki ölkə arasında biznes əlaqələrinin daha da genişləndirilməsini razılaşdırıblar.
Bu təşəbbüs Azərbaycan və Efiopiya arasında ticarət, sənaye və investisiya əlaqələrinin möhkəmləndirilməsi istiqamətində atılmış mühüm addımdır.
Məlumat üçün bildiririk ki, Addis Ababa Chamber of Commerce and Sectoral Associations (Addis Chamber) 1947-ci ildə təsis olunub və Efiopiyanın ən nüfuzlu işgüzar təşkilatlarından biridir. Quruma 17 mindən çox şirkət üzvdür və o, ölkədə özəl sektorun inkişafına, sahibkarlığın gücləndirilməsinə və beynəlxalq ticarətin genişlənməsinə dəstək verir.
Addis Chamber mütəmadi olaraq biznes forumlar, sərgilər və beynəlxalq görüşlər təşkil edir və dövlət–özəl əməkdaşlığının inkişafında mühüm rol oynayır..
Ilin sonunda  keçiriləcək Efiopiya Biznes Forumu, Africa–Azerbaijan Cooperation (AFAZ) və Addis Chamber tərəfindən birgə təşkil olunacaq və hər iki ölkədən sənaye rəhbərlərinin, investorların və rəsmi şəxslərin iştirakı gözlənilir. Forum, Azərbaycan və Efiopiya arasında yeni iqtisadi körpünün qurulmasına mühüm töhfə verəcək.