Ermənistan və Azərbaycan sərhədlərinin delimitasiyası və demarkasiyası bölgədə sabitlik mühitinin formalaşmasında mühüm amildir.
TASS agentliyi xəbər verir ki, bu barədə avqustun 26-da Ermənistan parlamenti tərəfindən təsdiqlənən Ermənistanın yeni hökumətinin proqramı adlı sənəddə yazılıb.
“Bölgədə sülh bizim uzunmüddətli strategiyamızdır. Qonşu ölkələrlə münasibətləri dərinləşdirmək və ya normallaşdırmaq hökumətin xarici siyasətinin vacib istiqamətlərindən birinə çevriləcək. Artan düşmənçilik bölgənin sabitliyi və təhlükəsizliyi üçün təhdid yaradır. Azərbaycanla sərhədlərin demarkasiyası və delimitasiyası, sabit bir regional atmosferin formalaşması üçün əhəmiyyətli olacaq”, - Nikol Paşinyan hökumətinin proqramında qeyd olunur.
Sənəddə həmçinin vurğulanır ki, Ermənistan Nazirlər kabinetinin regionun blokdan çıxarılması üzrə xarici siyasəti, digərləri tərəfindən konstruktiv olaraq qəbul edilirsə, bölgədə dinc və qarşılıqlı faydalı bir mühitin yaranmasına səbəb olacaq.
“Bu kontekstdə əsas məsələ 9 noyabr 2020 və 11 yanvar tarixlərində Ermənistan, Rusiya və Azərbaycan liderlərinin imzaladıqları bəyanatlarda nəzərdə tutulan addımların tam və qeyd-şərtsiz həyata keçirilməsidir”, - deyə sənəddə qeyd olunur.