Ermənistanda Zəngəzur dəhlizi ilə bağlı Azərbaycan Respublikasının Xarici işlər naziri Ceyhun Bayramovun açıqlaması media qurumlarını üz-üzə qoyub.

 Ermənistanın “Faktların Yoxlanılması Platforması” (FIP) revanşist media qurumları olan “Yerevan Today” və “Alpha News”un yaydığı məlumatları yoxlayaraq onların Ceyhun Bayramovun sözlərini düzgün təqdim etmədiyi qənaətinə gəlib.

Məsələ Ceyhun Bayramovun Ermənistan ərazisindən keçərək Azərbaycanın əsas hissəsini Naxçıvanla birləşdirəcək marşrut barədə dediyi sözlərlə bağlıdır.

Bayramov açıqlamasında belə deyib:

“Bura Ermənistan ərazisi hesab olunsa da, giriş və çıxış Azərbaycan ərazisindən həyata keçiriləcək”.

Lakin “Yerevan Today” və “Alpha News” bu fikri təqdim edərkən Bayramovun guya Ermənistan ərazisindən keçən hissəyə Azərbaycanın nəzarət edəcəyini söylədiyini yazıblar.

FIP isə Bayramovun orijinal açıqlamasını yoxlayaraq müəyyən edib ki, nazir ümumiyyətlə “nəzarət” ifadəsini işlətməyib. Onun sözləri yolun haradan daxil olub haradan çıxacağını, yəni marşrutun istiqamətini təsvir edib. Başqa sözlə, söhbət Ermənistan ərazisindəki hissənin Azərbaycan tərəfindən idarə və ya nəzarət edilməsindən getməyib.

FIP xüsusi olaraq vurğulayıb ki, Bayramovun açıqlamasının Azərbaycan dilindəki orijinalında da “nəzarət” anlayışı yoxdur.musavat.com