ABŞ-ın dünyada təkbaşına istədiyi liderlik rolunu oynaması mümkün deyil.

Bunu Almaniya kansleri Fridrix Merts ZDF televiziyasında deyib. Kansler qeyd edib ki, o, amerikalıları dünyada tərəfdaşlara ehtiyac duyduqlarına inandırmağa çalışır.

Merts ABŞ-ın yeni Milli Təhlükəsizlik Strategiyasının onu təəccübləndirmədiyini vurğulayıb: "Bu, vitse-prezident J.D.Vensin fevral ayında Münhen Təhlükəsizlik Konfransında etdiyi çıxışa bənzəyir və bu çıxış məni xüsusi fond və Bundesverlə bağlı düzəliş etməyə vadar etdi, çünki sadəcə reaksiya verməli idik".

O, "dünyada siyasi və iqtisadi güc mərkəzlərində tektonik dəyişiklik"in baş verdiyini təkrarlayıb:  "Və mən Avropanın bunda rol oynamasını istəyirəm. Buna görə də mən Avropa birliyi üçün çalışıram. Əgər kimsə bunu öz vəzifəsindən istifadə edərək edə bilərsə, bu, Almaniya kansleridir".

Merts əlavə edib ki, "amerikalıları da dünyada tərəfdaşlara ehtiyac duyduqlarına inandırmağa çalışır": "Amerika birincidir" əlbəttə ki, yaxşıdır, amma "yalqız Amerika" da Amerikaya heç bir fayda verməyəcək. Bundan əlavə, ABŞ-dakı iqtisadi göstəricilərə nəzər yetirin. Təsəvvür edə bilərəm ki, amerikalılar sonda bizə tərəf dönüb deyirlər: "Təkcə Amerikaya deyil, hər ikimizə fayda verən bəzi məsələlər barədə yenidən danışmaq istəməzdikmi?"”

Merts ABŞ-ın yeni Milli Təhlükəsizlik Strategiyasına ciddi yanaşdığını qeyd edib: "Şübhəsiz ki, Amerika öz rolunu oynamaq istəyir. Bəlkə də hətta dominant rolunu oynaya bilər. Amma bunu təkbaşına edə bilməz".