Avropa İttifaqının rəhbərliyi Böyük Britaniyanın sifariş etdiyi koronavirusa qarşı “Pfizer/BioNTech” peyvəndinin bu ölkəyə ixracına məhdudiyyət tətbiq etmək istəyir.
Bu barədə “Independent” nəşri Avropa İttifaqı Şurasının Prezidenti Şarl Mişelin məktubuna istinadən məlumat yayıb.
Qeyd olunur ki, Şarl Mişel bu məsələni koronavirusa qarşı peyvənd çatışmazlığı fonunda Avropa Komissiyasının rəhbəri Ursula fon der Lyayenlə müzakirə edib. Defisit “AstraZeneca” şirkətinin cari ilin ilk rübündə Aİ-yə peyvənd tədarükünü 67 faiz azaltması ilə bağlı yaranıb.
Şirkətin Aİ-yə tədarükü azaltmasının səbəblərindən biri isə preparatın bir hissəsinin hazırlandığı Böyük Britaniyanın peyvənd təminatının artırılmasıdır. “AstraZeneca” bunu Britaniya ilə müqavilənin Aİ-dən daha tez bağlanması ilə əlaqələndirir.
Avropa vaksinasiya prosesində ABŞ və Britaniyadan geri qalıb. Belə ki, Britaniya və ABŞ müvafiq olaraq əhalisinin 11.3 və 7.1 faizini vaksinasiya etdiyi halda, Aİ-də bu rəqəm 2.2 faiz təşkil edib.