Portuqaliyanın “Onda FoodTech” startapı 3D printerlə hazırlanan vegan balıq yeməkləri ilə Avropa bazarına çıxır

Sahibkartv.az xəbər verir ki, Portuqaliyanın paytaxtı Lissabonda fəaliyyət göstərən innovativ qida texnologiyaları startapı – “Onda FoodTech”, qida sənayesində inqilabi yeniliyə imza atıb. Şirkət 3D printer texnologiyası vasitəsilə tamamilə bitki mənşəli inqrediyentlərdən hazırlanmış vegan əsaslı balıq yeməkləri istehsal etməyə başlayıb.

Yeməklərin tərkibində yüksək proteinli düyü zülalı, minerallarla zəngin yosun ekstraktı və təbii ləzzətverici rolunu oynayan tamarind pastası yer alır. Bu tərkib, həm balıq strukturuna oxşar tekstura yaradır, həm də dəniz məhsullarının klassik dadını imitasiya edir. Məhsullar qlütensiz, soya tərkibsiz və ətraf mühitə zərər verməyən şəkildə hazırlanır.

Hazırda bu texnoloji yenilik Danimarkada yerləşən bir sıra alternativ qida dükanlarında və vegana yönəlmiş restoran şəbəkələrində test satışına çıxarılıb. İlk rəy və analizlər məhsulun dadı, keyfiyyəti və vizual görünüşü baxımından yüksək qiymətləndirildiyini göstərir.

“Onda FoodTech” komandası bildirir ki, yaxın gələcəkdə bu texnologiya vasitəsilə ton balığı, som və hətta karides alternativləri də təqdim ediləcək. Məqsəd, həm qida sənayesində davamlı istehsalı təşviq etmək, həm də dəniz ekosisteminə düşən yükü azaltmaqdır.