Administrasiyanın qısa zamanda idxala rüsumlar tətbiq etmək imkanı olmasa, ABŞ-ın iqtisadi mövcudluğu şansı qalmayacaq. Musavat.com xəbər verir ki, bunu prezident Donald Tramp özünün Truth Social hesabında qeyd edib.

O, ABŞ məhkəmələrində tarif qərarlarının mübahisələndirilməsindən bəhs edərək yazıb: “Başqa ölkələr bizə qarşı tariflərdən istifadə edə bilsələr və biz onlara tariflərlə tez və çevik cavab verə bilməsək, ölkəmizin cüzi də olsa iqtisadi sağqalma şansı olmayacaq”.

Mayın 28-də ABŞ-ın Beynəlxalq Ticarət üzrə Federal Məhkəməsi Amerika liderinin idxal rüsumlarının tətbiqi ilə bağlı qərarının icrasını əngəlləyib və bunu prezident səlahiyyətlərindən sui-istifadə etməsi ilə əsaslandırıb. Məhkəmə təkcə Trampın aprelin 2-də elan etdiyi 185 ölkə və ərazinin məhsullarına cavab tariflərini deyil, həm də daha əvvəl Kanada, Çin və Meksikadan idxala tətbiq edilən tarifləri bloklayıb. Eyni zamanda, məhkəmə qərarı avtomobillərin və onların ehtiyat hissələrinin, polad və alüminiumun tədarükü tariflərinə şamil edilməyib.

Mayın 29-da ABŞ-ın Apellyasiya Məhkəməsi gömrük rüsumlarının bloklanmasına dair qərarı dayandırıb. Ağ Evin mətbuat katibi Karolin Levitt brifinqdə qeyd edib ki, ABŞ administrasiyası bu işi ölkənin Ali Məhkəməsinə vermək niyyətindədir.