Sahibkartv.az xəbər verir ki, Yaponiya 2025-ci ildən etibarən ölkə üzrə hər bir vətəndaşa rəqəmsal sağlamlıq kartı təqdim edir. Bu yeni sistem ölkədə səhiyyə xidmətlərinin keyfiyyətini artırmaq və tibbi məlumatların vahid platformada toplanmasını təmin etmək məqsədi daşıyır.
Rəqəmsal sağlamlıq kartı vətəndaşın bütün tibbi tarixçəsini, dərman reseptlərini, keçirdiyi əməliyyatları, müayinələrin nəticələrini və genetik analizləri əhatə edəcək. İstənilən klinika, xəstəxana və aptek bir toxunuşla həmin vətəndaşın sağlamlıq məlumatlarına çıxış əldə edə biləcək.
Yaponiyanın Səhiyyə Nazirliyi bildirir ki, bu sistem səhiyyə sektorunda operativliyi artıracaq, vaxt itkisini minimuma endirəcək və insan faktorundan doğan səhvlərin qarşısını alacaq. Eyni zamanda, vətəndaşlar öz şəxsi kabinetlərinə daxil olaraq bütün tibbi məlumatlarını izləyə və sağlamlıq tarixçələrini arxivləşdirə biləcəklər.
Yenilik rəqəmsal səhiyyə sistemində inqilab hesab edilir və Yaponiyanın gələcəkdə AI dəstəklı diaqnostika və müalicə üsullarına keçidinin əsasını qoyacaq. Sistem təhlükəsizlik baxımından blokçeyn texnologiyası ilə qorunacaq, məlumatların üçüncü şəxslərin əlinə keçməsi tamamilə istisna ediləcək.
