Sahibkartv.az xəbər verir ki, İsveç hökuməti 2025-ci ildən etibarən şəhərsalma və tikinti qanunvericiliyinə mühüm dəyişiklik edib. Yeni qərara əsasən, ölkə ərazisində tikiləcək bütün yeni binalarda ağaclı damların salınması məcburi olacaq.

Layihənin əsas məqsədi şəhərlərdə oksigen balansını artırmaq, mikroiqlimi yaxşılaşdırmaq, istixana effektini azaltmaq və ekosistemi gücləndirməkdir. “Green Roofs Act” adlanan bu proqram artıq Stokholm, Malmö və Göteborq şəhərlərində tətbiq olunmağa başlanıb.

İsveç Ekologiya Nazirliyi bildirib ki, ağaclı damlar həm estetik, həm də funksional üstünlükləri ilə seçiləcək. Damlarda xüsusi torpaq qatı yerləşdirilərək yerli iqlimə uyğun ağac və kollar əkiləcək. Bu, yay aylarında binaların temperaturunu 5-7 dərəcə aşağı salacaq, qışda isə izolyasiya effekti yaradacaq.

Layihə çərçivəsində həmçinin arı və quşlar üçün mini ekosistemlər yaradılacaq, beləliklə şəhərlərdə bioloji müxtəliflik də qorunacaq.

Ekspertlər hesab edir ki, bu yenilik Avropa İttifaqının yaşıl inkişaf strategiyasına nümunə olacaq və digər ölkələr üçün də model rolunu oynayacaq.