Fransa ictimai qalmaqallarla müşayiət olunan dərin siyasi və iqtisadi böhran yaşayır.

Bunu “TASS”a fransalı hərbi ekspert Ksavye Moro deyib.

Onun sözlərinə görə, Fransada vəziyyət fəlakətlidir: “İqtisadiyyatda dərin problemlər var, hökumət qeyri-sabitdir, onun gələcəyi isə qeyri-müəyyən olaraq qalır. İndiki Nazirlər Kabineti cəmi bir-iki aydır işləyir, bunun nə qədər davam edəcəyi məlum deyil”.

O qeyd edib ki, Fransada son iki ildə bir neçə baş nazir olub: “Bu da ciddi daxili problemlərə işarədir. Emmanuel Makron daxili siyasi problemlərdən qaçmaq üçün fransızların diqqətini xarici məsələlərə yönəltməyə çalışır. Bu məqsədlə Ukrayna mövzularından fəal istifadə edir və bununla da, 2022-ci ildən bəri Makron, xüsusən də seçki kampaniyaları zamanı özü üçün döyüşkən imici yaratmağa çalışır”.

Eyni zamanda, Moro qeyd edib ki, Avropa İttifaqı öz növbəsində Parisin köhnəlmiş avadanlıqları Kiyevə ötürməsi səbəbindən Makrona təzyiq göstərir. Məsələn, Almaniya Fransanın Ukraynaya silah tədarükünü artırmaqda israrlıdır.

Ekspert həmçinin qeyd edib ki, Fransa hərbi sənaye kompleksində çətinliklər yaşayır.(Report)