Aqrar ekspert Rəcəb Orucov qeyd edib ki, bu tendensiya yalnız Azərbaycana məxsus deyil. Dünyada artan ərzaq tələbatı daha məhsuldar və daşınmaya davamlı hibrid sortların istifadəsini genişləndirir. Bununla yanaşı, milli genetik ehtiyatların qorunması strateji əhəmiyyət daşıyır.
Ekspertin sözlərinə görə, Azərbaycanın nar, alma, üzüm və digər yerli sortları həm keyfiyyətinə, həm də bazar dəyərinə görə üstünlüyünü qoruyur. Bu səbəbdən milli genofondun saxlanılması gələcək kənd təsərrüfatı üçün vacib hesab edilir.
Rəcəb Orucov bildirib ki, yerli məhsulların əvvəlki dadını bərpa etmək mümkündür. Bunun üçün düzgün aqrotexniki qaydalara əməl olunmalı, kimyəvi preparatlar və mineral gübrələr normadan artıq istifadə edilməməlidir. Əks halda məhsuldarlıq artsa da, dad və keyfiyyət zəifləyə bilər.
Ekspert vurğulayıb ki, keyfiyyətli məhsulun əldə olunması yalnız toxumdan deyil, torpaq, suvarma, gübrələmə, bitkiyə qulluq və fitosanitar tədbirlərin düzgün həyata keçirilməsindən də birbaşa asılıdır. Onun fikrincə, yerli sortların qorunması ilə müasir istehsal texnologiyalarının balanslı şəkildə tətbiqi həm ərzaq təhlükəsizliyi, həm də məhsulların keyfiyyətinin saxlanılması baxımından əsas şərtlərdən biridir.
