Azərbaycanda sentyabrın 1-də Milli Məclisə keçiriləcək növbədənkənar seçkilərdə 97 saylı Tərtər-Ağdərə-Goranboy Seçki Dairəsindən namizədliyi YAP tərəfindən irəli sürülmüş Anar Məmmədov seçkiqabağı təşviqat çərçivəsində seçicilərlə görüşlərini davam etdirir. Seçicilərin yüksək fəallığı ilə keçən görüşlərdə Anar Məmmədov Müzəffər Ali Baş Komandan, Azərbaycan Respublikasının Prezidenti cənab İlham Əliyevin rəhbərliyi ilə 44 günlük Vətən müharibəsində qazanılan Zəfər, Azərbaycan Respublikasının ərazi bütövlüyü və suverenliyinin tam bərpa edilməsi, ölkəmizdə həyata keçirilən uğurlu islahatlar haqqında geniş məlumatlar verir.

Qeyd edək ki, Ağdərə rayonu bərpa edildiyinə görə keçmiş 97 saylı Goranboy – Ağdam – Tərtər Seçki Dairəsinin adı dəyişdirilərək 97 saylı Tərtər-Ağdərə-Goranboy Seçki Dairəsi adlandırılıb. Son seçici siyahılarına görə, dairə üzrə 49 min 185 seçici qeydə alınıb. Seçicilər arasında yaşı 100-dən yuxarı olan vətəndaşların sayı 7 nəfərdir. İlk dəfə səsvermə hüququ qazanan gənclər isə 506 nəfərdir.

Seçki Dairəsinə daxil olan 59 seçki məntəqələrindən biri Ağdərədə, digəri isə Suqovuşanda fəaliyyət göstərir. İşğaldan azad edilmiş doğma yurda qayıdışın sevincini yaşayan bölgə sakinləri deputatlığa namizədlə görüşlərində Prezident, Müzəffər Ali Baş Komandan İlham Əliyevə, Birinci vitse-prezident Mehriban xanım Əliyevaya, torpaqlarımızı işğaldan qurtaran rəşadətli Azərbaycan Ordusuna, qəhrəman əsgər və zabitlərimizə minnətdarlıqlarını bildirirlər. A.Məmmədov həmçinin seçiciləri platformasında nəzərdə tutulan məsələlər haqqında məlumatlandırır. Görüşlərdə çıxış edən seçicilər deputatlığa namizəd A.Məmmədova yedilliklə dəstək ifadə edirlər.

Xatırladaq ki, 40 yaşlı millət vəkili daha əvvəl 96 saylı Goranboy – Naftalan Seçki Dairəsindən VI çağırış Milli Məclisin üzvü olub.

Rüstəm Nağıyev