2021-ci ilin Mart ayında Azərbaycanda cəmi kredit qoyuluşları 108,5 milyon manat artaraq 31 Mart 2021-ci il tarixində 14 milyard 728 milyon manata çatıb. Fevralın sonunda cəmi kredit qoyuluşları 14 milyard 619,5 milyon manat idi.
Mərkəzi Banka istinadən ötən ilin sonu ilə müqayisədə (ilk rübdə) kredit qoyuluşları 197,6 milyon manat artıb. 2020-ci ilin sonunda cəmi kredit qoyuluşları 14 milyard 530,4 milyon manat təşkil etmişdi.
Yanvarda artan kreditlər fevralda azalmışdı. Martda yenidən kreditlər artıb.
Mart ayında kredit qoyuluşlarındakı 108,5 milyon manatlıq artımın 98 milyon manatlıq hissəsi ev təsərrüfatlarına verilən kreditlərin (əsasən istehlak kreditlərinin) artması ilə bağlıdır. Fevralın saonunda ev təsərrüfatlarına verilən kreditlər 6 milyard 771,3 milyon manat ikən, Mart ayının sonunda 6 milyard 869,3 milyon manata çatıb.  
PROBLEMLİ KREDİTLƏR ARTIR
31 Mart 2021-ci il tarixində cəmi kredit qoyuluşlarının 918,2 milyon manatını və ya 6,2%-ni ödəmə vaxtı keçmiş kreditlər təşkil edib. Ötən ilin sonunda ödəmə vaxtı keçmiş kreditlər 893,1 milyonmanat, Fevralın sonunda isə 917,5 milyon manat təşkil etmişdi.