İsmayıllı rayonunda payızlıq taxıl əkini başa çatıb və gələn ilin məhsulu üçün 30074 hektar sahədə səpin aparılıb. 
Rayon Dövlət Aqrar İnkişaf Mərkəzindən AZƏRTAC-ın bölgə müxbirinə bildirilib ki, əkin sahələrinin 22255 hektarı buğda, 7564 hektarı arpa, 255 hektarı isə xəsillikdir. Səpində yüksək reproduksiyalı toxumlardan, yerli şərait üçün daha çox sərfəli olan “Bezostaya-1”, “Aran” buğda, “Qarabağ-22”, “Cəlilabad-19” arpa sortlarından istifadə olunub. Şum altına kifayət qədər fosforlu gübrə verilib.
İsmayıllının iri taxılçılıq təsərrüfatlarından olan Qubaxəlilli kənd ərazi dairəsində cari mövsümdə 4110 hektar sahədə taxıl əkilib. Habelə, Hacıhətəmlidə 1640 hektar, Qalagahda 1500 hektar sahədə səpin aparılıb. Artıq rayonda əkin sahələrinin 70 faizində normal çıxış alınıb. Bu sahələr daha tez səpin aparılan ərazilərdir.