Azərbaycanın ərazi bütövlüyü uğrunda canlarını qurban vermiş Vətən müharibəsi şəhidlərinin əziz xatirəsi Gürcüstanda da ehtiramla yad edilib.
Dekabrın 4-də Azərbaycanın Gürcüstandakı səfirliyində anım tədbiri keçirilib.
Səfir Faiq Quliyev və səfirliyin əməkdaşları Azərbaycan torpaqlarının Ermənistanın işğalından azad edilməsi uğrunda aparılan Vətən müharibəsində həlak olmuş şəhidlərimizin xatirəsini bir dəqiqəlik sükutla yad ediblər.
Anım tədbirindən sonra tarixdə ilk dəfə olaraq Gürcüstanda, səfirliyin ərazisində işğaldan azad edilmiş Qarabağ torpağında becərdilmiş və düşmən üzərində şanlı zəfərimizin rəmzlərindən biri olan Xarı bülbül gülü əkilib.
Bununla da Qarabağın ətri, qələbə əzmi Gürcüstana da gətirilib.
Qeyd edək ki, Xarı bülbül gülü Gürcüstana “AS Georgia” şirkətinin direktoru Emin Abbasovun dəstəyi ilə gətirilib.