Azərbaycan sahibkarları Pakistana məxsus "Global Business Alliance" beynəlxalq şəbəkələşmə platformasında təmsil olunacaq.
Bunu "Sahibkartv.az"a açıqlamasında Platformanın İdarə Heyətinin sədri Muhammad Asif Noor bildirib.
"Global Business Alliance"da müxtəlif ölkələrdən ticarət palataları var. Burada təkcə Pakistan deyil, müxtəlif ölkələrdən biznes subyektləri yer alır. Əsas ideyamız odur ki, bu platforma, yalnız Pakistan deyil, bütün dünyadan əczaçılıq palataları, hökümət institutları və biznesmenlər arasında bir körpü olsun. Çünki, hazırda biznes sektorunda əsas problem inamsızlıqdır", - deyə o qeyd edib.
"Məsələn, mən Pakistanlı biznesmenəm və Azərbaycandan bir sahibkarlıq subyekti ilə əməkdaşlıq qurmaq istəyirəm. "Google"da axtarış aparacam, onu tapacam, ona "e-mail" göndərəcəm, sonra o, mənə cavab yazacaq və beləliklə əlaqə yaranacaq. Ancaq onun necə biri olduğunu bilmirəm, o da məni tanımır. Nəticədə arada problemlər yaranacaq. Biz bu platformanı yaratmışıq ki, real biznesmenləri tapaq.
Məsələn, siz Pakistandan hansısa biznes subyektinin məhsulunu istəyirsinizsə, biz sizə məlumat verəcəyik ki, bu biznes subyekt etibarlıdır və sizi aldatmaz. Sonra siz pulu göndərə bilirsiniz və sizin vəsait batmır. Biz bu platformanı biznes subyektlərinin işini asanlaşdırmaq üçün yaratmışıq. Platforma çərçivəsində məlumat bazası yaradırıq və onu öz saytımızda yerləşdirəcəyik. Azərbaycan və Pakistan hökümətləri bizə etibarlı şirkətlərinin adlarını və ünvanlarını verəcək, biz onu öz saytımızda yerləşdiricəyik. Bİz həmçinin qarşılıqlı investisiya məsələlərini müzakirə edirik. Hələlik əsasən kənd təsərrüfatı sektoru ilə bağlı əməkdaşlıq etməyi düşünürük", - deyə sədr əlavə edib.