Bunu "Sahibkartv.az"a a açıqlamasında "FAO-Azərbaycan Tərəfdaşlıq Proqramı"nın idarəetmə mütəxəssisi Namiq Məmmədov deyib.
Onun sözlərinə görə, bu, ölkədə toxumçuluq sektorunu daha rəqabətqabiliyyətli formaya salacaq, yerli toxum istehsalçılarının beynəlxalq toxum bazarına daxil olmasına şərait yaradacaq.
"Layihənin əsas məqsəd Azərbaycandalə toxum istehsalçılarının beynəlxalq bazarlara çıxışının asanlaşdırılmasına dəstək verməkdir. Xaricdən gətirilən toxum növlərinin Azərbaycanda sınaqdan keçirilməsi üçün şərait yaradılması mühümdür. Eyni zamanda, ölkənin toxumçularının beynəlxalq toxum bazarına daxil olmaq üçün mütləq şəkildə ölkənin labarotoriyalarında beynəlxalq ekspertizanın aparılması vacibdir. Bu, təmin edildikdən sonra artıq Azərbaycanda toxumçular bir neçə ildən sonra beynəlxalq bazara çıxıb öz məhsullarını satmaq imkanları əldə edəcəklər. Bu, daha çox perspektivdə nəzərdə tutulan işlərdir. Əsas problem budur ki, beynəlxalq standartlarla bağlı məlumatsızlıq var. Ölkə toxumçularının əksəriyyəti SSRİ dövründə tətbiq edilən normativlərlə işləyirlər, bu da həm daxili istehlakda, həm də məhsulların xarici bazara çıxışında müəyyən problemlər yaradır. Bu baxından fermerlərin maarifləndirilməsi, beynəlxalq normalar və standartlarla tanış olması, laboratoriya əməkdaşlarının bilik və bacarıqlarının artırılması zəruridir. Bundan əlavə, regionlarda toxum anbarlarının az olması da keyfiyyətli toxumun əldə edilməsində çətinlik yaradır. Bununla bağlı, hazırda “Azərbaycanda sağlam kartof toxumçulu sisteminin yaradılması” layihəsi çərçivəsində Tərəvəzçilik Elmi-Tədqiqat İnstitutunun Tovuz rayonundakı bölməsində sağlam kartof toxumu üçün anbarın tikintisinə başlayarıq. Baxmayaraq ki, Azərbaycanda müəyyən həcmdə kartof toxumu istehsal edilir, amma onların saxlanma şərairi çox aşağıdır. Saxlanma anbarlarının tələblərə cavab verməməsi toxumun keyfiyyətinə mənfi təsir göstərməklə yanaşı, məhsuldarlığı da azaldır".
Onun sözlərinə görə, bu layihənin əsas məqsədi Aqrar Xidmətlər Agentliyinin nəzdində fəaliyyət göstərən laboratoriyaların beynəlxalq sertifikasiyaya uyğun hazırlığına dəstək vermək, onların İSO Standartlarına uyğun olaraq prosedurlara başladılması üçün texniki dəstək verməkdir: "Layihə "Tərəfdaşlıq Proqramı" çərçivəsində həyata keçirilir. Onun icrasına 2022-ci ilin aprel ayından başlanılıb, 2024-cü ildə başa çatdırılması planlaşdırılır. Layihənin əsas komponentləri arasında mərkəzi laboratoriyaların idarəetmə potensialının yaradılması, regional laboratoriyalar üçün koordinasiyanın qurulması nəzərdə tutulur. Məqsəd aqrokimyəvi laboratoriyalar üçün monitorinqlərin həyata keçirilməsi, məlumat sisteminin hazırlanmasıdır. Əsas komponent isə laboratoriyaların maddi bazasının və insan potensialının gücləndirilməsi nəzərdə tutulur".
N.Məmmədov deyib ki, bu məqsədlə beynəlxalq ekspertlər prosesə cəlb edilib: "Hazırda həmin laboratoriyaların qiymətləndirilməsi həyata keçirilir,. Belə ki, həm insan resurslarının, həm də maddi texniki bazasının qiymətləndirilməsi həyata keçirilir. Bu layihə çərçivəsində həmin laboratoriyaların mütəxəsisləri üçün toxum qeydiyyatı, toxum sertifikatlaşdırma sahəsində müvafiq təlimlər təşkil ediləcək. Mütəxəsislərin müxtəlif sahələr üzrə Avropaya və Türkiyəyə səfərləri nəzərdə tutulub. Eyni zamanda, mərkəzi laboratoriyanın maddi texniki bazasının gücləndirilməsi üçün müvafiq işlərin aparılması, müvafiq laboratoriya avadanlıqların alınması, işçilərin təlimləndirilməsi, laboratoriyaların beynəlxalq standartlara uyğunlaşdırılması nəzərdə tutulur".
O əlavə edib ki, regionlarda toxum-sınaq mərkəzlərinin təchizatının gücləndirilməsi, bu mərkəzlərin beynəlxalq səviyyədə işinin təşkili ilə bağlı dəstəyin verilməsi də planlaşdırılır: “Burada sahələrin beynəlxalq standartlara uyğunlaşdırılması, toxum-sınaq mərkəzlərində istehsal edilən məhsulların saxlanılma şəraitinin inkişaf etdirilməsi planlaşdırılır. Çünki bu sertifikasiyanın əsas tələblərindəndir. Toxumun keyfiyyətli saxlanılması üçün toxum-sınaq məntəqələrinin standartlara uyğunlaşdırılması nəzərdə tutulur".