Türkiyə Prezidenti Rəcəb Tayyib Ərdoğan mayın 4-də İrəvanda keçiriləcək Avropa ölkələri arasında strateji yaxınlaşma, əməkdaşlıq, dialoq və koordinasiyanı təşviq etmək üçün yaradılan Avropa Siyasi Birliyinin (EPC) iclasına dəvət olunub. 

 "Gələcəyin Qurulması: Avropada Birlik və Dözümlülük" adlı görüşə Avropa Şurasının prezidenti António Kosta və Ermənistanın baş naziri Nikol Paşinyan həmsədrlik edəcək.

Ankara hələlik Ərdoğanın İrəvandakı görüşdə iştirak edib-etməyəcəyi ilə bağlı rəsmi açıqlama verməyib. "Ərdoğanın iştirak edib-etməyəcəyini demək hələ tezdir. İştirakçıların siyahısı hələ dəqiqləşdirilməyib. Onun iştirakı yaxın günlərdə dəqiqləşdiriləcək", - deyə Avropa İttifaqının sözçüsü bildirib.

BBC-nin məlumatına görə, əgər Ərdoğan İrəvan sammitində iştirak etməsə, Türkiyə təmsil olunmayacaq, çünki qaydalarda yalnız dövlət və hökumət başçılarının iştirak edə biləcəyi göstərilir. Nazirlər səviyyəsində və ya daha aşağı səviyyədə təmsil olunmağa icazə verilmir.
Aİ hesab edir ki, Ermənistan-Türkiyə normallaşdırma prosesinin davamlı irəliləməsi regionda kök salan daha geniş müsbət dinamikanı əks etdirir və bu dinamika uzunmüddətli sülh və sabitlik üçün vacibdir.