Alparslan Bayraktar

Trans-Anadolu Qaz Boru Kəməri (TANAP) və Trans-Adriatik Qaz Boru Kəməri (TAP) layihələri hazırda dünya üçün nümunədir.
Bu fikirləri "Sahibkartv.az"un yerli bürosuna açıqlamasında Türkiyənin enerji və təbii sərvətlər nazirinin müavini Alparslan Bayraktar İstanbulda keçirilən Avropada Təhlükəsizlik və Əməkdaşlıq Təşkilatı (ATƏT) Parlament Assambleyasiyasının İpək Yolu qrupunun 4-cü Beynəlxalq parlament konfransı zamanı bildirib.
Onun sözlərinə görə, dünyanın yeni və alternativ enerji qaynaqlarının axtarışında olduğu bir dövrdə TAP və TANAP, bundan sonra həyata keçirilməsi planlaşdırılan digər enerji layihələri üçün çox böyük üstünlükləri olan örnəkdir, nümunədir.
Nazir müavini qeyd edib ki, TANAP və TAP layihələri Avropanın enerji təminatının təhlükəsizliyi üçün çox önəmli layihələrdir: “Bu layihələrin reallaşdırılması üçün Türkiyə və Azərbaycan prezidentləri çox böyük siyasi iradə ortaya qoyublar. Əlbəttə, belə bir ciddi layihələrin reallaşması həm də region ölkələri olan Gürcüstan, Yunanıstan, Albaniya və İtaliya hökumətlərinin dəstəyi ilə mümkün olub".
Xatırladaq ki, Azərbaycanın təbii qaz həcmləri Cənubi Qafqaz Boru Kəməri (Bakı-Tbilisi-Ərzurum) və TANAP vasitəsilə Türkiyə bazarına çatdırılır. Bakı-Tbilisi-Ərzurum kəməri ilə ilk qaz Türkiyə bazarına 2007-ci ildə daxil olub. TANAP vasitəsilə Türkiyəyə kommersiya qazının nəqlinə isə 2018-ci il iyunun 30-da başlanılıb.
Türkiyəyə Azərbaycanın “Şahdəniz” yatağından hasil edilən təbii qaz nəql olunur.
Qeyd edək ki, hazırda Azərbaycan qazının Avropanın cənubuna nəql olunduğu Cənub Qaz Dəhlizinin Avropa hissəsi olan TAP-ın ötürücülük qabiliyyəti ildə 11 milyard kubmetr qaz təşkil edir.
TAP AG konsorsiumu kəmərin ötürücülüyünün artırılması üçün 3 ssenarini nəzərdən keçirir: məhdud - 14,4 milyard kubmetrə qədər, qismən - 17,1 milyard kubmetrə qədər və tam - ildə 20 milyard kubmetrə qədər.
TAP-ın tikintisi 2020-ci ilin oktyabrında başa çatıb. TAP-ın ümumi uzunluğu 878 km-dir ki, bunun da 550 km-i Yunanıstanın şimal hissəsindən, 215 km-i Albaniya ərazisindən, 105km-i Adriatik dənizinin dibi ilə, 8 km-i isə İtaliya ərazisindən keçir.