Azərbaycandan Rusiyaya ixrac olunan pomidor və alma məhsullarına tədbiq edilən məhdudiyyətlərin aradan qaldırılması istiqamətində Azərbaycan Respublikasının Qida Təhlükəsizliyi Agentliyi (AQTA) və aidiyyəti qurumların birgə tədbirləri davam etdirilir.
Agentlikdən bildirilib ki, həyata keçirilən birgə tədbirlər çərçivəsində Agentliyin mütəxəssisləri və Rusiya Dövlət Baytarlıq və Fitosanitar Nəzarət üzrə Federal Xidmətinin əməkdaşlarının iştirakı ilə respublika ərazisi üzrə fəaliyyət göstərən pomidor və alma istehsalı müəssisələrində birgə videomonitorinqlər davam etdirilir. Bununla yanaşı, müəssisələrdə həyata keçirilən sağlamlaşdırıcı tədbirlər və aparılan araşdırmaların nəticələri ilə bağlı məlumatlar mütəmadi qaydada Rusiya tərəfinə təqdim olunur.
Görülən işlərin məntiqi nəticəsi olaraq “Rosselxoznadzor” tərəfindən 2021-ci il 10 avqust tarixindən daha 8 alma istehsalı müəssisəsindən bu ölkəyə alma ixracına icazə verilib.
Bu günə qədər Rusiya Federasiyasının müvafiq qurumu tərəfindən 54 alma istehsalı müəssisəsindən Rusiyaya məhsul ixracına icazə verilib. Rusiya Federasiyasına alma ixracına icazə verilmiş müəssisələrin ixrac potensialı 121 517 ton təşkil edir ki, bu da 2020-ci il ərzində Rusiyaya ixrac olunan alma məhsulunun 181,5 %-i həcmindədir.