Koronavirus (COVID-19) pandemiyası ilə əlaqədar 2020-ci ilin mart ayından başlayaraq turizm sektorunun əsas elementlərindən biri olan iaşə müəssiələrinin fəaliyyətində yaranmış tənəzzül hələ də davam edir.
Sahibkartv.Az-ın Dövlət Statistika Komitəsindən əldə etdiyi mlumata əsasən, ilin yanvar-fevral aylarında ictimai iaşə dövriyyəsi 2020-ci ilin eyni dövrü ilə müqayisədə 2,9 dəfə azalıb.

Belə ki, iki ay ərzində ümumi dövriyyə 78,1 milyon manata bərabər olub. Təkcə fevral ayında isə ictimai iaşə obyektlərində dövriyyə 42,6 milyon manatı təşkil edib. Yanvar ayı ilə müqayisədə fevral ayında dövriyyə həcmi 20 faiz artıb.
Dövlətə məxsus ictimai iaşə müəssisələrində dövriyyə 984,5 min manatı təşkil edib və bu ötən illə müqayisədə 2,5 dəfə azalıb. Özəl sektor üzrə ictimai iaşə dövriyyəsinin həcmi isə ötən ilin eyni dövrü ilə müqayisədə 2,9 dəfə azalaraq 77,1 milyon təşkil edib.
Özəl sektorda ictimai iaşə dövriyyəsinin 40,7 faizi hüquqi şəxslərin, 59,3 faizi isə bu sahədə sahibkarlıq fəaliyyəti ilə məşğul olan fiziki şəxslərin payına düşür.
Hüquqi şəxslər üzrə dövriyyə 2020-ci ilin yanvar-fevral ayları ilə müqayisədə 2,8 dəfə azalaraq 31,4 milyon manat olub.
Sahibkarlıq fəaliyyəti ilə məşğul olan fiziki şəxslər üzrə dövriyyə isə 2,9 dəfə azalaraq 45,7 milyon təşkil edib.