Azərbaycanın iqtisadi inkişaf gündəliyində sahibkarlığın genişləndirilməsi, investisiya imkanlarının artırılması və milli məhsulların xarici bazarlara çıxışının gücləndirilməsi istiqamətində yeni sistemli mərhələ başlayır. Prezident İlham Əliyevin 24 fevral 2026-cı il tarixli 607 nömrəli Fərmanına uyğun olaraq Azərbaycan Respublikasının İqtisadiyyat Nazirliyi yanında Kiçik və Orta Biznesin İnkişafı, İnvestisiyaların və İxracın Təşviqi Agentliyinin fəaliyyətə başlaması bu baxımdan mühüm addımdır.
Yeni qurumun yaradılması yalnız dövlət strukturlarında aparılan növbəti dəyişiklik kimi qəbul edilə bilməz. Burada əsas məqsəd sahibkarlığın inkişafı, investisiyaların təşviqi və ixracın artırılması kimi bir-biri ilə sıx bağlı olan iqtisadi istiqamətlərin daha vahid, çevik və nəticəyönümlü mexanizm əsasında idarə edilməsidir. Başqa sözlə, biznesin inkişafına dövlət dəstəyi, ölkəyə kapital və yeni texnologiyaların gətirilməsi, eləcə də Azərbaycan məhsullarının beynəlxalq bazarlarda mövqelərinin genişləndirilməsi eyni institusional çərçivədə daha sıx əlaqələndiriləcək.
Agentliyin fəaliyyətinin mühüm istiqamətlərindən biri mikro, kiçik və orta sahibkarlığın inkişafına əlavə imkanlar yaratmaqdır. Çünki iqtisadiyyatın dayanıqlılığının təmin edilməsində, yeni iş yerlərinin yaradılmasında, regionların iqtisadi fəallığının artırılmasında və rəqabət qabiliyyətli yerli məhsulların formalaşmasında məhz bu biznes subyektlərinin xüsusi çəkisi var. Bu baxımdan sahibkarların maliyyə və qeyri-maliyyə dəstək mexanizmlərinə çıxışının asanlaşdırılması, onların maarifləndirilməsi, biznes bacarıqlarının artırılması və dövlət xidmətlərindən daha rahat yararlanması yeni qurumun fəaliyyətində mühüm yer tutacaq.

Digər mühüm istiqamət investisiyaların təşviqidir. Müasir iqtisadi rəqabətdə ölkələrin üstünlüyünü müəyyən edən əsas amillərdən biri yalnız daxili kapitalın həcmi deyil, həm də xarici investor üçün yaradılan mühit, təqdim olunan imkanlar və investisiya layihələrinin cəlbediciliyidir. Yeni Agentliyin fəaliyyəti Azərbaycan iqtisadiyyatına yeni investisiyaların cəlb olunması, investorların layihələr üzrə məlumatlandırılması, onların dövlət qurumları ilə əlaqələrinin əlaqələndirilməsi və ölkənin investisiya potensialının beynəlxalq səviyyədə daha geniş təqdim edilməsi baxımından əhəmiyyət daşıyır.
Xüsusilə qeyri-neft-qaz sektoruna investisiyaların yönəldilməsi strateji əhəmiyyət kəsb edir. Azərbaycan iqtisadiyyatının şaxələndirilməsi, ənənəvi enerji sektorundan kənarda yeni istehsal və xidmət sahələrinin inkişaf etdirilməsi, yüksək əlavə dəyər yaradan müəssisələrin sayının artırılması və ixrac coğrafiyasının genişləndirilməsi ölkənin uzunmüddətli iqtisadi prioritetləri sırasında yer alır. Bu prosesdə investisiyaların təşviqi ilə ixrac imkanlarının artırılmasının eyni platformada əlaqələndirilməsi əlavə üstünlüklər yarada bilər.
Agentliyin digər əsas fəaliyyət sahəsi isə ixracın təşviqidir. Azərbaycan məhsullarının dünya bazarlarına çıxarılması, yerli şirkətlərin xarici bazarlarda tanıdılması, yeni ixrac istiqamətlərinin müəyyənləşdirilməsi və sahibkarların beynəlxalq ticarət imkanlarından daha geniş istifadə etməsinə şərait yaradılması qeyri-neft sektorunun inkişafına birbaşa təsir göstərən amillərdəndir. Bu baxımdan ixracatçıların xarici bazarlara çıxış zamanı qarşılaşdıqları maneələrin müəyyənləşdirilməsi və onların həlli üçün müvafiq mexanizmlərin formalaşdırılması da xüsusi önəm daşıyır.
Yeni institusional model dövlət-biznes münasibətlərinin daha da təkmilləşdirilməsi baxımından diqqət çəkir. Sahibkar üçün əsas məsələlərdən biri yalnız biznes qurmaq deyil, fəaliyyətini genişləndirərkən dövlət dəstəyinə, zəruri informasiyaya və müvafiq xidmətlərə vaxtında və rahat çıxış əldə etməkdir. Bu baxımdan xidmətlərin daha əlçatan, şəffaf və çevik formada təşkil olunması biznes mühitinin yaxşılaşdırılmasına mühüm təsir göstərə bilər.
Agentliyin qarşısında duran vəzifələr sırasında sahibkarların hüquq və qanuni maraqlarının qorunmasında iştirak, dövlət qurumları ilə biznes arasında əlaqələndirmənin gücləndirilməsi, elektron “G2B” xidmətlərinin inkişaf etdirilməsi, sahibkarların və potensial investorların məlumatlandırılması da xüsusi yer tutur. Bu istiqamətlər üzrə effektiv mexanizmlərin qurulması biznesin dövlət qurumları ilə münasibətlərində operativliyin və şəffaflığın artmasına imkan verə bilər.
Yeni Agentliyin fəaliyyətində regionların iqtisadi potensialının üzə çıxarılması da mühüm istiqamətlərdən biri kimi ön plana çıxır. Regionlarda fəaliyyət göstərən kiçik və orta sahibkarlıq subyektlərinin inkişaf etdirilməsi, yerli istehsalın genişləndirilməsi, yeni investisiya layihələrinin təşviqi və həmin məhsulların ixrac imkanlarının artırılması həm regional inkişafı sürətləndirə, həm də ölkə iqtisadiyyatında qeyri-neft sektorunun payının yüksəlməsinə əlavə imkanlar yarada bilər.
Bütün bunlar göstərir ki, yeni Agentliyin yaradılmasının mahiyyəti yalnız bir neçə dövlət funksiyasının vahid qurumda cəmləşdirilməsi ilə məhdudlaşmır. Burada daha geniş iqtisadi məqsəd sahibkarlığın gücləndirilməsi, investisiya mühitinin daha da yaxşılaşdırılması, yerli biznesin böyüməsinin stimullaşdırılması və Azərbaycanın ixrac potensialının artırılması qarşıya qoyulur. Azərbaycanın qarşıdakı dövrdə iqtisadi inkişafının əsas istiqamətlərindən biri özəl sektorun daha da gücləndirilməsi və qeyri-neft iqtisadiyyatının yeni imkanlar hesabına genişləndirilməsidir. Bu baxımdan mikro, kiçik və orta biznesin inkişafı ilə investisiya və ixrac siyasətinin bir-birindən ayrı deyil, vahid iqtisadi strategiyanın tərkib hissələri kimi həyata keçirilməsi mühüm əhəmiyyət daşıyır. Yeni Agentliyin fəaliyyətinin də məhz bu üç istiqamət arasında daha sıx əlaqə yaradaraq Azərbaycan biznesinin böyüməsinə, investisiya imkanlarının genişlənməsinə və milli məhsulların dünya bazarlarında daha güclü təmsil olunmasına xidmət etməsi gözlənilir.