Hər 100 manat kreditin 20 manatı ABŞ dolları ilə götürülüb

Azərbaycan bankları tərəfindən verilmiş hər 100 manat kreditin 20 manatı ABŞ dolları ilə verilib.
Sahibkartv.az xəbər verir ki, Mərkəzi Bank kredit portfeli üzrə dollarlaşma səviyyələrini açıqlayıb.
Qeyd edilib ki, 2022-ci ilin sonu ilə müqayisədə 2023-cü ilin birinci yarısında bankların kredit portfelinin dollarlaşması 0.2 faiz bəndi (f.b.) azalaraq 19.9% təşkil etmişdir. Azalmanın əsas drayveri istehlak kreditləri ollmuşdur. Belə ki, ilk yarımil ərzində istehlak kreditləri üzrə dollarlaşma səviyyəsi 0.7 f.b. azalaraq 5.5% təşkil etmişdir.
Eyni zamanda, ipoteka kreditlərinin dollarlaşması 0.1 f.b. azalaraq 0.2% təşkil etmişdir.
Yarımil ərzində biznes portfeli üzrə dollarlaşma isə 0.5 f.b. artaraq 33.4% olmuşdur.
"Xarici valyutada gəliri olmayan borcalanlara xarici valyutada istehlak kreditlərinin verilməsinin məhdudlaşdırılması və xarici valyutada verilən kreditlər üzrə əlavə risk çəkisinin müəyyən edilməsi istehlak portfelinin dollarlaşmasının azalmasını şərtləndirmişdir. Habelə, Mərkəzi Bankın normativ xarakterli aktlarına əsasən ipotekakreditinin yalnız milli valyutada verilməsi tələbi ipoteka kreditləri üzrə portfelin demək olar ki, milli valyutada olmasını şərtləndirmişdir",- Mərkəzi Bank qeyd edib.
DEPOZİTLƏRİN DOLLARLAŞMASI
Mərkəzi Bank bildirib ki, 2023-cü ilin birinci yarısında bank sisteminin depozit porfelinin dollarlaşması 5.4 f.b azalaraq 41.7%, kredit portfelinin dollarlaşma səviyyəsi isə 0.2 f.b azalaraq 19.9% təşkil etmişdir.
"Depozit portfeli üzrə de-dollarlaşmanın əsas drayveri hüquqi şəxslərin xarici valyutadakı tələbli depozitlərinin azalması olmuşdur. Son 6 ay ərzində hüquqi şəxslərin xarici valyutadakı tələbli depozitləri 3.1 mlrd. manat azalmışdır ki, bu da hüquqi şəxslər üzrə depozit portfelinin dollarlaşmasının 6.3 f.b. azalaraq 44.6%-ə enməsinə səbəb olmuşdur. Hüquqi şəxslərin müddətli depozitləri üzrə də uzunmüddətli de-dollarlaşma trendi davam etmişdir. Ötən ilin sonu ilə müqayisədə hüquqi şəxslərin müddətli depozitləri üzrə dollarlaşma səviyyəsi 2.4 f.b. azalaraq 67.7% təşkil etmişdir".
Fiziki şəxslərin depozitləri üzrə dollarlaşmanın azalması cari ilin ilk yarısında da davam etmişdir. 2023-cü ilin ilk altı ayı ərzində ümumilikdə fiziki şəxslərin cəmi depozitlərinin dollarlaşması 2.7 f.b. azalaraq 37.1% təşkil etmişdir.
"Manatın sabitliyi və milli valyutada depozit faiz dərəcələrinin yüksək olması fiziki şəxslərin milli valyutada müddətli depozitlərinin artımını şərtləndirir. Belə ki, müddətli depozitlərin dollarlaşması 2023-ci ilin ilk yarısında 2.1 f.b. azalaraq 36.9% olmuşdur. Ötən ilin sonu ilə müqayisədə fiziki şəxslərin xarici valyutada tələbli depozitləri üzrə də dollarlaşmanın azalması müşahidə edilmişdir. Belə ki, fiziki şəxslərin tələbli depozitləri üzrə dollarlaşma səviyyəsi 3.3 f.b azalaraq 37.4% olmuşdur",- Mərkəzi Bank bildirir.