Rusiya və İran arasında ticarət dövriyyəsi 2021-ci ildə yeni rekord həddə çataraq 3,3 milyard dolları ötüb.
Marja xəbər verir ki, bunu Rusiya Baş nazirinin müavini Aleksandr Novak İranın neft naziri Cavad Oudci ilə görüşündən sonra bildirib.

Həmçinin Aleksandr Novak qeyd edib ki, koronavirus infeksiyası ilə mübarizə sahəsində də ölkələr arasında əməkdaşlıq inkişaf edir - Rusiyanın Sputnik V peyvəndinin İranda birgə istehsalı qurulub.
“Artıq enerji sektorunda və iqtisadiyyatın digər sahələrində bir sıra iri layihələr həyata keçirilir, perspektivli layihələr var ki, onların üzərində işləmək lazımdır. Biz həmçinin OPEC+ sazişi çərçivəsində və Qaz İxrac edən Ölkələrin Forumu çərçivəsində çoxtərəfli formatlarda uğurla qarşılıqlı fəaliyyət göstəririk”, - deyə baş nazirin müavini vurğulayıb.
Aleksandr Novakın sözlərinə görə, biznes səviyyəsində ikitərəfli işgüzar əməkdaşlığın optimallaşdırılmasını daha da təşviq etmək lazımdır.
“İnzibati maneələrin azaldılmasını davam etdirmək, ölkələrimiz arasında ticarət dövriyyəsinin artırılmasına şərait yaratmaq lazımdır”, - deyə o əlavə edib.