Beynəlxalq Mülki Aviasiya Təşkilatının (ICAO) son hesabatı pandemiyanın ən çox mənfi təsir etdiyi sahələrdən biri olan hava nəqliyyatı ilə sərnişindaşımada zərərin nə qədər iri həcmdə olduğunu əyani şəkildə göstərir.
yenicə açıqlanan hesabata əsasən,2019-cu illə müqayisədə 2020-ci ildə aviaşirkətlə hər uçuşda yerlərin cəmi 50%-ni satışa çıxarıb. Sərnişindaşımanın həcmi 60%, yaxud 2,7 milyard nəfər azalıb. Karantin məhdudiyyətləri və hava limanlarının boş dayanması səbəbindən qlobal aviasiya sənayesinə təxminən 371 milyard dollar ziyan dəyib.
Beynəlxalq sərnişin daşınmalarında təklif olunan yerlər 66%, səyahət edən sərnişinlərin sayı 1,37 milyard nəfər, yaxud 74% azalıb. Bu sektorun zərəri 250 milyard dollar təşkil edir. Daxili sərnişindaşımalarda isə azalma 50%, yaxud 1,32 milyard nəfər təşkil edib, şirkətlərin daxili aviareyslərdən zərəri 120 milyard dollara yaxın olub.
Beynəlxalq qurum 2021-ci il üzrə proqnozlarını da açıqlayıb. Bu il təklif olunan sərnişin yerlərinin 2019-cu illə müqayisədə 33-39% daha az olacağı, sərnişin sayında azalmanın 1,8-2,1 milyard nəfər təşkil edəcəyi (azalma - 41-49%), qlobal aviasiya sənayesinin 2021-ci ili də zərərlə başa vuracağı gözlənilir. Bu ilki zərər 275-323 milyard dollar arasında dəyişəcək.

Ötən il sərnişin dövriyyəsi və gəlirləri iri həcmdə azalan aviasiya sənayesində Asiya-Sakit okean regionu ciddi itkilərə məruz qalan regionlar sırasında öndə gəlir. Ən son dünən Sinqapurun milli aviaşirkəti, gəlirlərinin həcminə görə qlobal siyahıda 15-ci, beynəlxalq sərnişin daşımalarına görə isə 10-cu sırada qərarlaşan Singapore Airlines cari ilin martında bitən maliyyə ilində 4,27 milyard Sinqapur dolları (3,2 milyard dollar) zərər etdiyini açıqlayıb. Bu, şirkətin tarixində indiyə qədər yaşanan ən böyük maliyyə itkisidir. İllik gəlir 76% azalaraq, 3,82 milyard Sinqapur dolları (2,86 milyard dollar) təşkil edib. Əsas istiqamətlərdən biri olan Honkonqla uçuşların mayın 26-dan bərpa olunmasına və qarşıdan gələn turizm mövsümünə baxmayaraq, Singapore Airlines sərnişin sıxlığının iyun ayında pandemiyadan əvvəlki göstəricinin cəmi 28%-nə çatacağını proqnozlaşdırır.
Avstraliyanın ən iri aviaşirkəti Qantas Airways isə bugünkü açıqlamasında iyunda bitəcək 2021-ci maliyyə ilində 2 milyard Avstraliya dolları (1,5 milyard dollar) zərər gözlədiyini bildirib. Şirkət məcburi işçi ixtisarlarını hələ də davam etdirəcəyini qeyd edib və Avstraliya hökumətinə müraciət edərək, ölkədəki karantin vəziyyətinin qənaətbəxş olmasına görə sərhədlərin ilin sonuna kimi mütləq açılmasını xahiş edib.