Pentaqonun Yaxın Şərqə göndərdiyi üçüncü təyyarədaşıyan gəmini - USS Theodore Roosevelt-i dörd idarə olunan raket daşıyıcısı müşayiət edir.
Məlumatı ABŞ Hərbi Dəniz Qüvvələrinin sözçüsü açıqlayıb.
Daşıyıcı zərbə qrupuna USS Chosin kreyseri və USS Paul Hamilton, USS Decatur və USS Carl M. Levin esminesləri daxildir. Daşıyıcı və onun müşayiətçi gəmilərinin noyabr ayının sonuna qədər Yaxın Şərqdəki ABŞ Mərkəzi Komandanlığının tabeliyinə (CENTCOM) çatması planlaşdırılır.
USS Theodore Roosevelt ötən bazar günü Kaliforniyadakı San Dieqo Hərbi Dəniz Bazasından yola düşüb. Onun göyərtəsində bir eskadrilya F-35C Lightning II beşinci nəsil qırıcıları, üç eskadrilya F/A-18E/F Super Hornets, bir eskadrilya EA-18G Growlers, eləcə də E-2D Hawkeye hava erkən xəbərdarlıq təyyarələri, MH-60R Seahawk və MH-60S Seahawk helikopterləri və CMV-22B Osprey tiltrotor təyyarələri var.
Bir gün sonra, başqa bir amfibiya hücum qrupunun gəmiləri eyni bazadan Yaxın Şərqə yola düşüb. Buraya flaqman gəmisi olan amfibiya hücum gəmisi USS Makin Island və iki eniş-vertolyot dok gəmisi USS John P. Murtha və USS Anchorage daxildir. Onların tərkibində 2500 hərbçidən ibarət 13-cü Dəniz Ekspedisiya Batalyonu, eləcə də iki eskadrilya F-35B şaquli qalxma və eniş qırıcıları, tiltrotor təyyarələri, hücum və nəqliyyat vertolyotları və eniş gəmiləri var.
