Avropa ölkələri arasında isə Türkiyə tank sayına görə lider mövqeyini qoruyur. Geniş zirehli texnika parkı və strateji müdafiə siyasəti sayəsində Ankara digər Avropa NATO üzvlərini geridə qoyur. Yunanıstan da yüksək tank sayına malik ölkələr sırasında yer alsa da, Türkiyə açıq üstünlüyə malikdir.
Məlumata görə, Böyük Britaniya və Fransa son illərdə tank sayını artırmaq əvəzinə daha müasir və yüksək texnologiyalı döyüş platformalarına üstünlük veriblər. Baltik ölkələri və Belçika isə müdafiə xərclərini əsasən hava hücumundan müdafiə sistemləri və təkərli zirehli texnikanın inkişafına yönəldirlər.
Hərbi ekspertlər vurğulayırlar ki, ordunun gücü təkcə tankların sayı ilə ölçülmür. Müasir texnologiyalar, şəxsi heyətin hazırlığı, logistika imkanları və müxtəlif döyüş sistemlərinin inteqrasiyası da hərbi potensialın əsas göstəriciləri hesab olunur.
