İran İslam Şurası Məclisinin sədri Məhəmməd Baqir Qalibaf tərəfdaşlarla razılaşdırılmış çərçivə sazişinin şərtlərinin pozulması ilə bağlı kəskin bəyanatla çıxış edib.

 İRNA xəbər verir ki, parlament sədri Livana edilən hücumlar, İranın hava məkanının pozulması və uranın zənginləşdirilməsi hüququnun inkar edilməsini razılaşmanın üç əsas bəndinin pozulması kimi qiymətləndirib.

Qalibaf bildirib ki, İran tərəfi 10 bəndlik planla bağlı prosesi əvvəldən etimadsızlıqla izləyib və ABŞ gözlənildiyi kimi, danışıqlar masasına oturmazdan əvvəl öz öhdəliklərinə sadiq qalmayıb.

O qeyd edib ki, ABŞ prezidentinin şəxsən işlək baza kimi qəbul etdiyi planın icrası artıq sual altındadır.

Pozulan bəndləri aşağıdakı kimi təsnif edib:

Livanda atəşkəs: On bəndlik planın birinci bəndi olan təcili atəşkəs rejiminə əməl olunmayıb. Pakistanın baş naziri Şahbaz Şərifin də dəstəklədiyi "dərhal və hər yerdə atəşkəs" tələbi yerinə yetirilməmiş qalıb.

Hava məkanının toxunulmazlığı: Fars vilayətinin Lar şəhərində ölkənin hava məkanına daxil olan təcavüzkar PUA-nın vurulması göstərir ki, müdaxilənin qadağan olunması bəndi kobud şəkildə pozulub.

Nüvə hüquqları: İranın uranı zənginləşdirmək hüququnun inkar edilməsi çərçivə sazişinin altıncı bəndinin birbaşa pozulmasıdır.

Sədr vurğulayıb ki, danışıqlar başlamazdan əvvəl prinsiplərin bu dərəcədə tapdalanması mövcud şəraitdə həm qarşılıqlı atəşkəsin, həm də diplomatik təmasların mahiyyətini itirdiyini göstərir.