Türkiyə prezidenti Rəcəb Tayyib Ərdoğan amerikalı həmkarı Donald Trampa İranla bağlı üçtərəfli sammit keçirməyi təklif edib.

Bu barədə "Hürriyet" qəzeti məlumat yayıb.

Nəşrin məlumatına görə, Ərdoğan bu təklifi 27 yanvarda ABŞ prezidenti ilə telefon danışığı zamanı səsləndirib.

O, ABŞ, İran və Türkiyə arasında videokonfrans formatında yüksək səviyyəli görüşün keçirilməsini təklif edib.

"Trampın Ərdoğanın təklifinə müsbət yanaşdığı bildirilir", - deyə nəşrin köşə yazarı Hande Fırat yazıb. 

Qəzet həmçinin İranın xarici işlər naziri Abbas Əraqçinin bu həftə həmkarı Hakan Fidanla danışıqlar aparmaq üçün Türkiyəyə səfər edəcəyini bildirib, lakin konkret tarixlər açıqlanmayıb.

Qeyd edək ki, Türkiyə və İran xarici işlər nazirləri sonuncu dəfə yanvarın 28-də telefonla danışıblar və İran ətrafındakı son hadisələri, bölgədəki gərginliyin azaldılması səylərini müzakirə ediblər.

Ankara İran ətrafındakı vəziyyətin diplomatik yollarla həll olunacağına ümid edir. Bu barədə Türkiyə Prezidentinin xarici siyasət və təhlükəsizlik məsələləri üzrə baş müşaviri Akif Çağatay Kılıç çərşənbə axşamı "TRT Haber"də bildirib. O qeyd edib ki, Türkiyə İranın işlərinə xarici müdaxilənin müsbət nəticə verməyəcəyinə inanır.

Xatırladaq ki, dekabrın 29-da İranda rialın kəskin şəkildə ucuzlaşması ilə başlayan küçə etirazlarından sonra iğtişaşlar başlayıb və əksər böyük şəhərlərə yayılıb.

Abbas Əraqçinin sözlərinə görə, 8 yanvardan bəri nümayişçilər arasında silahlı terrorçular peyda olub. Tehran baş verən iğtişaşların təşkilində İsrail və ABŞ-ı ittiham edib.