“The Wall Street Journal” Rusiyanın süni intellekt sahəsində vəziyyətini kəskin tənqid edən yeni araşdırma dərc edib.

Məlumata görə, Vladimir Putinin “strateji prioritet” elan etdiyi İİ sektoru ölkənin texnoloji ambisiyalarını doğrultmaq əvəzinə, böhranı daha da dərinləşdirib.

 Stenford Universitetinin reytinqində Rusiya 36 ölkə arasında cəmi 28-ci yerdədir. Ölkənin ən yaxşı İİ modelləri belə ChatGPT və Gemini-nin köhnə versiyalarından geri qalır. “Yandex”in sabiq top-meneceri Yuriy Podoroşnı vəziyyəti belə ifadə edib: “Rusiya bu yarışı uduzub”. 

Sanksiyalar İİ sektorunu çökdürür

Sanksiyalar nəticəsində ölkəyə çip və qrafik prosessor idxalı 84% azalıb. Şirkətlər avadanlığı yalnız vasitəçilərdən və qeyri-rəsmi kanallardan əldə edə bilir. Bu çatışmazlıq mövcud sistemlərin stabil işləməsinə belə mane olur.

İnvestisiyalar yox dərəcəsindədir

Rusiyanın bütün İİ startapları son bir ildə birlikdə cəmi 30 milyon dollar investisiya cəlb edib. Müqayisə üçün, təkcə OpenAI 6 milyard dollardan çox maliyyə toplayıb.

Beyin axını – həlledici zərbə

Ölkədən çıxan yüksək ixtisaslı mütəxəssislərin sayı kritik həddə çatıb — ekspertlərə görə, son illərdə güclü İİ mühəndislərinin təxminən 80%-i Rusiyanı tərk edib. Bu isə ölkənin texnoloji sıçrayış etmək imkanlarını faktiki olaraq sıfıra endirir.

Araşdırmanın yekunu açıqdır: Rusiya süni intellekt yarışında həm texniki, həm maliyyə, həm də kadr potensialı üzrə ciddi şəkildə geridə qalıb.