Birləşmiş Millətlər Təşkilatının dərc etdiyi hesabatda qlobal dövlət borcunun 2022-ci ildə rekord həddə - 92 trilyon dollara çatdığı açıqlanıb.

 


Birləşmiş Millətlər Təşkilatının (BMT) dərc etdiyi hesabata görə, hökumətlərin Covid-19 pandemiyası kimi böhranlara qarşı borc alması nəticəsində qlobal dövlət borcu 2022-ci ildə rekord həddə - 92 trilyon dollara çatıb. 
Sahibkartv.az xəbər verir ki, Qurum, borc yükünün inkişaf etməkdə olan ölkələr tərəfindən ciddi şəkildə hiss olunduğunu vurğulayıb.
G20-nin maliyyə nazirləri və mərkəzi bank rəhbərlərinin görüşündən əvvəl açıqlanan hesabata görə, dünya miqyasında daxili və xarici borc son iyirmi ildə beş dəfədən çox artaraq iqtisadi artım tempini üstələyib. Ümumi Daxili Məhsul isə 2002-ci ildən bəri cəmi üç dəfə artıb.
Hesabata görə, qlobal dövlət borcunun təxminən 30 faizi inkişaf etməkdə olan ölkələrin payına düşürsə, bu rəqəmin 70 faizi Çin, Hindistan və Braziliyaya məxsusdur.
İnkişaf etməkdə olan 59 ölkənin yüksək borc səviyyəsi var
Əlli doqquz inkişaf etməkdə olan ölkədə borcun ÜDM-ə nisbəti 60 faizdən yuxarıdır. Bu nisbət ekspertlər tərəfindən yüksək borc səviyyələrini göstərən hədd kimi qəbul edilir.
BMT-nin hesabatında deyilir: “Maliyyəyə məhdud çıxış, artan borclanma xərci, valyuta devalvasiyaları və yavaş iqtisadi artım səbəbindən borc inkişaf etməkdə olan ölkələr üçün əhəmiyyətli bir yükə çevrilir”.
Dünya 50 inkişaf etməkdə olan ölkə iqtisadi gəlirlərinin 10 faizindən çox hissəsini faiz borcunun ödənilməsinə yönəldir. İnkişaf etməkdə olan ölkələr üçün maliyyəyə çıxış həm qeyri-adekvat, həm də bahalıdır.
"Afrika təhsil və ya səhiyyədən daha çox faiz ödənişlərinə pul xərcləyir. Ölkələr borclarını ödəmək və ya xalqına xidmət etmək arasında qeyri-mümkün seçim qarşısındadır", - hesabatda deyilir.