İyulun 1-də Düşənbə şəhərində Kollektiv Təhlükəsizlik Müqaviləsi Təşkilatının (KTMT) Parlament Assambleyası Şurasının görüşü keçirilib.
Sahibkartv.az “haqqin.az”a istinadən xəbər verir ki, görüşdə KTMT-də tərəfdaş ölkələr institutunun yaradılması ilə bağlı qərar qəbul edilib.
Rusiya Dövlət Dumasının Mətbuat Xidmətinin verdiyi məlumata əsasən, bu təklifi Parlament Assambleyasının sədri, Dövlət Dumasının spikeri Vyaçeslav Volodin irəli sürüb.
Dumanın Avrasiya inteqrasiya məsələləri üzrə komitəsinin rəhbəri Leonid Kalaşnikov isə tərəfdaş ölkələrə namizəd olan ölkələrin adlarını açıqlayıb.
Belə ki, KTMT-nin tərəfdaş ölkə statusuna ən çox maraq göstərən ölkələr Azərbaycan və Pakistandır.
O vurğulayıb ki, hər iki ölkə KTMT yanında müşahidəçi statusu almaq üçün çoxdan öz arzularını bildiriblər.
Vyaçeslav Volodin bildirib ki, tərəfdaş ölkələr KTMT strukturlarında həlledici səsə malik olmayacaqlar. Lakin bununla belə, bu ölkələr sənədlərin hazırlanmasında və kollektiv qərarların yaradılmasında iştirak etmək hüququna sahib olacaqlar. O deyib ki, dövlətlərə rəsmi tərəfdaş statusu vermək ölkələr arasında qarşılıqlı fəaliyyəti aktivləşdirmək imkanı yaradacaq.