Koronavirus infeksiyasının üçüncü dalğası Azərbaycanda səhiyyə sisteminin yükünü artırıb. Həkimlər demək olar ki, hər bir insanın həyatı üçün daha çox mübarizə aparmaq məcburiyyətindədirlər.
Sahibkartv.az pandemiya dövründə iki dəfə koronavirusa yoluxan və hazırda xəstələrin müalicəsini davam etdirən həkim-infeksionist Nicat Əzimli ilə söhbət edib.
- Koronavirus infeksiyasının üçüncü dalğasının şahidi olduq. Bu əvvəlki iki dalğadan nə ilə fərqlənir?
- Bu, genişmiqyaslı statistik tədqiqatların nəticələri göründükdən sonra qiymətləndirilə bilər.
- Bəs şəxsi fikriniz necədir?
- Mənim subyektiv fikrimcə, bu gün xəstəliyin daha mütərəqqi və ağır gedişi ilə qarşılaşırıq. Qəbul etdiyimiz xəstələrin əksəriyyəti ilə təmasda olanlar da infeksiya daşıyıcısıdır. İndi ailədə yalnız bir yoluxmuş şəxsin olması halı ilə demək olar ki, qarşılaşmırıq. Bu, infeksiya dinamikasındakı sıçrayışı və yeni Britaniya ştammının yoluxuculuğunu izah edir. Dəlillərim yeni ştamma yoluxanların faizini müəyyən edə biləcək laboratoriya tədqiqatları keçiriləcəyi halda öz təsdiqini tapa bilərdi.
- Britaniya ştammının daha təhlükəli olduğunu nəzərə alsaq, ölüm hallarının hansı yaş kateqoriyasında daha çox olduğunu deyə bilərsiniz?
- Əvvəl olduğu kimi yaşlı insanlar daha çox ölürlər. Gənc xəstələrə gəldikdə, bu kateqoriyadakı ölümlər ümumi yoluxma sayının kəskin artımı ilə izah edilə bilər.
- Bütün dünya koronavirusa qarşı peyvəndin meydana çıxmasını gözləyirdi. Artıq o var, pandemiyanı məğlub etmək üçün bundan sonra nə qədər vaxt lazımdır?
- Vaksinasiya bizim yeganə ümidimizdir, əks halda pandemiyanı məğlub edə bilməyəcəyik. Qısa müddət ərzində əhalinin 80 %-ni peyvənd etsək, rahat nəfəs ala bilərik. Bu xəstəlik mövcud olmağa davam etsə belə, artıq vətəndaşların həyatı üçün təhlükəli olmayacaq.
- Hazırda virusa yoluxanların sayında kəskin bir sıçrayış müşahidə etdiyimizi nəzərə alsaq, karantini sərtləşdirməyə ehtiyac varmı?
- Karantin rejiminin sərtləşdirilməsi son çarədir. Bu gün istəsək də, istəməsək də, bu yola doğru gedirik: Koronavirusa yoluxanların sayı artır, xəstəxanalar dolur... Həkimlər bunu hər gün müşahidə edirlər.