Dünyanın ən böyük özəl səhiyyə təminatçılarından biri “Acıbadem” Xəstəxanalar Qrupu ilə Azərbaycan sığorta bazarının ən gənc sığorta şirkəti olan “Meqa Həyat Sığorta" ASC arasında əməkdaşlıq müqaviləsi imzalanıb.
Bakıda keçirilən tədbirdə hər iki tərəfdən olan nümayəndələr – “Acıbadem” Xəstəxanalar Qrupu Beynəlxalq layihələrin inkişafı və əməliyyatlar direktoru Murat Pekmezoğlu, “Meqa Həyat Sığorta" şirkətinin İdarə Heyətinin sədri Uğur İbrahimli iştirak ediblər.
Tədbirdə hər iki tərəfin nümayəndələri çıxış edərək işgüzar münasibətlərin inkişafından və daha da sıx əməkdaşlıq üçün qarşıda duran vəzifələrdən danışıblar.
Daha sonra qonaqlara “Acıbadem” Xəstəxanalar Qrupunun “Meqa Həyat Sığorta" ilə birgə təqdim etdiyi “Health Point” sadiqlik kartı layihəsi barədə məlumat verilib.
Sözügedən layihə çərçivəsində sığorta şirkətinin müştəriləri onlara təqdim olunan “Health Point” kart vasitəsilə imtiyazlar əldə edir. Ortaq əməkdaşlıq çərçivəsində “Health Point” kartları müştərinin yazılı razılığı əsasında təqdim olunacaq və kartlara görə heç bir əlavə ödəniş tələb edilməyəcək.
“Acıbadem” Xəstəxanalar Qrupunun Beynəlxalq layihələrin inkişafı və əməliyyatlar direktoru Murat Pekmezoğlu isə bildirib ki, 25 ölkədə 50 əlaqələndirici ofisləri və 5 ölkədə 24 xəstəxana mövcuddur:
“1991-ci ildə açılan xəstəxana adını məhz Türkiyədə, İstanbulun Acıbadem məhəlləsindən götürüb.
Xəstəxanaların sadəcə 16-sı Türkiyədə fəaliyyət göstərir. Artıq Avropada ilk türk markası olaraq “Acıbadem” xəstəxanası Hollandiyada açılıb. Azərbaycanda isə danışıqlar hələ davam edir və şərtlərin razılaşdığı halda “Acıbadem” xəstəxanasının açılması mümkün ola bilər. İndiki iş birliyimiz yalnız Azərbaycandan olan xəstələri Türkiyəyə göndərmək deyil, həmçinin həkimlərimizi Bakıya gətiririk. “Acıbadem” Xəstəxanalar Qrupunda Azərbaycan həkimləri də çalışır. Buradakı səhiyyə sistemini də çox bəyənirəm. Mən öz sağlamlığımı Azərbaycan həkimlərinə əmanət edə bilərəm”, - M.Pekmezoğlu qeyd edib. 
Onun sözlərinə görə, “Acıbadem” xəstəxanalarında bir çox ağır xəstəliklərin uğurlu müalicəsi aparılır: “Həkimlərimiz Amerikada, İngiltərədə, Avropada dünya standartlarına uyğun öz peşəkarlıqlarını artırırlar. Peşəkar kadrların yetişdirilməsi üçün “Acıbadem” Universiteti də fəaliyyət göstərir”.
M.Pekmezoğlu "Meqa Həyat” sığorta şirkəti ilə ortaq layihədən danışarkən deyib ki, “Acıbadem Health Point” sadiqlik kartlarının sahibləri bir çox üstünlüklərdən yararlana biləcəklər: “Ən əsası “Health Point” kartı vasitəsilə “Acıbadem”in Türkiyədəki həkimləri tərəfindən ikinci tibbi rəyin alınması mümkündür, bunun üçün sığorta şirkətinin müştəriləri klinikanın Bakı ofisinə müraciət etməklə pasientin tibbi müayinə sənədlərini təqdim etmək lazımdı və müvafiq cavab 48 saat ərzində verilir”. 
"Meqa Həyat” sığorta şirkətinin İdarə Heyətinin sədri Uğur İbrahimli təqdim edilən yeni “Health Point” kartları ilə bağlı bildirib ki, bu kartlar vasitəsi ilə sığorta şirkətinin müştəriləri “Acıbadem” xəstəxanalarında tibbi xidmətlər zamanı 5 %-dən 20 %-ə qədər güzəştlər əldə edəcəklər: “İstanbula səfər zamanı bütün hava limanlarında “Health Point Welcome Lounge”a giriş, İstanbuldakı “Acıbadem” xəstəxanalarına gediş-gəliş üçün VIP transfer və digər güzəştlər əldə edəcəklər. Endirimlərdən kart sahibi ilə yanaşı onun birinci dərəcəli qohumları - ana, ata, həyat yoldaşı və övladları da yararlanacaqlar.
“Acıbadem Health Point” layihəsi ilkin mərhələdə “Meqa Həyat” şirkətinin “Həyatın Yaşam Sığortası”na yeni qoşulmuş müştərilərinə şamil ediləcək. Lakin mövcud müştərilərimiz də müraciət etməklə bu kartları əldə edə bilərlər”.