Bir çox ölkədə qış aylarında tərəvəz bahalaşdığı üçün fermerlər yeni çıxış yolu tapıb: istixana (sera) biznesi. Bu sistem fermerlərə ilboyu məhsul yetişdirməyə imkan yaradır. Pomidor, xiyar, kahı, bibər və hətta çiyələk kimi məhsullar qışda belə təzə şəkildə bazara çıxarılır.

İstixana texnologiyası əvvəl bahalı hesab olunurdu, lakin indi sadə variantlardan başlayaraq müasir avtomatlaşdırılmış sistemlərə qədər geniş seçim mövcuddur. Bu da müxtəlif büdcəyə sahib fermerlər üçün imkan yaradır. Müasir sistemlər isə suya qənaət edir, temperaturu avtomatik tənzimləyir və məhsuldarlığı artırır.

Sahibkarlar üçün ən böyük üstünlük qiymət artımıdır. Çünki qışda tərəvəzə tələb çox, təklif az olur. Sahibkartv.az xəbər verir ki, bəzi fermerlər qışda əldə etdiyi gəlirlə bütün il üçün investisiya büdcəsini formalaşdırır. Digərləri məhsulu restoran və otellərlə müqaviləli şəkildə sataraq sabit gəlir əldə edir.

Sera biznesi təkcə istehsal yox, məşğulluq da yaradır. Çünki ilboyu yığım, çeşidləmə və çatdırılma prosesi davam edir. Bu sahə kənd təsərrüfatında yeni dövrün açarı hesab olunur və yaxın illərdə istixanaların sayının artırılacağı gözlənilir.